ත්‍රිරෝද රථයකට බද්ද රු 480000ක්


ත්‍රිරෝද රථයක මිල මේ වනවිට රුපියල් ලක්‍ෂ අටකට අධික බවත්, එම මුදලින් රුපියල් හාරලක්‍ෂ අසූදහසක් රජය බදු වශයෙන් අයකර ගන්නා බවත් ලංකා ස්වයං රැකියා නියුක්තිකයන්ගේ ත්‍රි‘රෝද රථ සංගමය සඳහන් කරයි.

ත්‍රි‘රෝද රථ හිමියන්ට සහන ලබාදෙන ලෙස ජනාධිපති මෛත්‍රීපාල සිරිසේන මහතාට සන්දේශයක් පවා භාරදී තිබියදී මෙවර අයවැය තුළින් රුපියල් හැටදහසක බද්දක් අලුතින් එකතු කර ඇති බවත්, ඒ හේතුවෙන් ත්‍රි‘රෝද රථයකට අයකරන බදු ප්‍රමාණය ඉහළ ගිය බවත් එම සංගමයේ සභාපති සුනිල් ජයවර්ධන මහතා සඳහන් කළේය.

දුප්පතාගේ වාහනය හා දුප්පතාගේ ප්‍රවාහන සේවය ලෙස සැලකෙනුයේ ත්‍රි‘රෝද රථය බවත්, එහෙත් පාලකයන් අකාරුණික ආකාරයට කටයුතු කළ බවත් හෙතෙම පවසා සිටියේය.

මෙරට සමස්ත ක්‍රියාවලියම ඉන්ධන මත රඳා පවතින බැවින් ඉන්ධන මිල සූත්‍රය ඉවත් කර, සාමාන්‍ය පරිදි ජීවත් වීමට ජනතාවට අවස්ථාව ලබාදෙන ලෙස ජනාධිපති මෛත්‍රීපාල සිරිසේන මහතාගෙන් පසුගියදා ලිඛිතව ඉල්ලා සිටි බවත්, එම ඉල්ලීම මුදල් අමාත්‍යාංශයට යොමුකළ බවට ජනාධිපති කාර්යාලය දැන්වූ බවත් සභාපතිවරයා පැවසීය.

එම ඉල්ලීම් සියල්ල ඉවත දමා ඔක්ටේන් 92 වර්ගයේ පෙට්‍රල් ලීටරයක මිල රුපියල් 03කින්, ඔක්ටේන් 95 වර්ගයේ පෙට්‍රල් ලීටරයක මිල රුපියල් 07කින්, ඔටෝ ඩීසල් මිල රුපියලකින් හා සුපර් ඩීසල් මිල රුපියල් 08කින් ඉහළ දැමූ බවද ඒ මහතා සඳහන් කළේය.

ආණ්ඩුවේ බදු නිසා පීඩාවට පත්ව සිටි ජනතාව ඉන්ධන මිල ඉහළ දැමීම හේතුවෙන් තවත් අසරණ තත්ත්වයට පත්ව සිටින බවත්, මේ නිසා ඉන්ධන මිල ඉහළ යෑමට සාපේක්‍ෂව ත්‍රිරෝද රථ ගාස්තුව ඉහළ දැමීමට කටයුතු නොකරන බවත් සභාපතිවරයා පැවසීය.

එහෙත් ආණ්ඩුවේ ක්‍රියාකලාපයට එරෙහිව ඉදිරි මැතිවරණවලදී ත්‍රි‘රෝද රථ හිමිකරුවන් ආණ්ඩුවට ප්‍රතිචාර දක්වනු ඇති බවද ඔහු සඳහන් කළේය.

Ad Widget

Recommended For You

About the Author: Editor

Leave a Reply

Your email address will not be published. Required fields are marked *