නීති සම්මේලනයේදී ‘නීතිඥ ප‍්‍රජාවට’ ජනපතිගෙන් ‘විශේෂ’ ඉල්ලීමක්

අනවශ්‍ය නිලධාරීවාදය සහ අධික රෙගුලාසි ඉවත්කර දේශීය ව්‍යවසායකයන්ට සහ විදේශීය ආයෝජකයන්ට රටේ නව ව්‍යාපාර ඇති කිරීමේ අවස්ථා පුළුල් කළ යුතුව ඇතැයි ජනාධිපති ගෝඨාභය රාජපක්ෂ පවසයි.

එමගින් ව්‍යාපාරවලට පහසුකම් සැලසිය හැකි සරල කාර්යක්ෂම හා විධිමත් ව්‍යුහයක් නිර්මාණය වනු ඇත. ඒ සඳහා පුළුල් සහයක් ලබාදීමට නීතිඥ ක්ෂේත්‍රයට හැකියාව ඇතැයි ඊයේ (14) මීගමුවේ පැවති ජාතික නීති සම්මේලනය 2020 අමතමින් ජනාධිපති සඳහන් කළේය.

ශ්‍රී ලංකා නීතිඥ සංගමය වාර්ෂිකව සංවිධානය කරන සම්මන්ත්‍රණයේ මෙවර තේමාව වූයේ“ශ්‍රි ලංකාව, මූල්‍ය සහ වාණිජ කේන්ද්‍රය : දැක්ම, අභියෝග සහ ඉඩ ප්‍රස්ථා යන්නයි.

පුළුල් ක්ෂේත්‍ර රැසක් ඔස්සේ, වේගයෙන් දියුණුවන තාක්ෂණික ක්‍රමවේද ගෝලීය වාණිජ සහ කර්මාන්තවල විශාල පරිවර්තනයක් ඇති කරමින් තිබේ.එම පරිවර්තනය සමග ශ්‍රී ලංකාවද ඉදිරියට ගමන් කළයුතු යැයි ජනාධිපතිතුමා අවධාරණය කළේය. වේගවත් ආර්ථික සංවර්ධනයක් උදෙසා නව වෙනස්කම් මගින් ලබාදෙන අවස්ථා ප්‍රයෝජනයට ගැනීමට උත්සුක විය යුතු බව ද ජනාධිපතිතුමා පැවසීය.

වේගවත් තාක්ෂණික විපර්යාසය සමග ලොව වඩාත් වැදගත් වෙළෙඳපොළ වශයෙන් ආසියාව කේන්ද්‍රගතවී තිබේ. ආසියාවේ නැගී සිටීම අප රටේ ආර්ථික සංවර්ධනය ඇත් කර ගැනිමට ද උපරිම වශයෙන් ඉවහල් කර ගත යුතුය.  ඒ සඳහා කෙටි, මධ්‍ය සහ දිගු කාලීන වශයෙන් ක්‍රමවේද සකසා ගැනීමේ අවශ්‍යතාව පෙන්වා දුන් ජනාධිපතිතුමා මේ අරමුණ සාක්ෂාත් කර ගැනීමට තම රජය කැපවන බව ද කියා සිටියේය.

තොරතුරු තාක්ෂණ අංශයේ සමාගම්වලට සැලකිය යුතු බදු සහන මේ වන විටත් ලබා දී තිබේ. ක්ෂේත්‍රයේ ආයෝජනයට සහ වැඩි රැකියා අවස්ථා නිර්මාණයට දේශීය සහ විදේශීය සමාගම් දිරි ගැන්වීමට රජය ක්‍රියාකරන බව ද ජනාධිපතිතුමා සඳහන් කළේය. ජාතික සංවර්ධනය වේගවත් කිරීමට සහ ආර්ථිකයේ පූර්ණ ශක්‍යතාවට අවශ්‍ය සංශෝධන කිරීමට රජය අදහස් කරයි. ව්‍යාපාරික රෙගුලාසි පද්ධතිය වැඩිදියුණු කිරීම ද අත්‍යාවශ්‍ය වේ. එමගින් ව්‍යාපාර කිරීමේ පහසුව සැලසෙන අතර අක්‍රමිකතා හා අයතා භාවිතය වළක්වා ගැනීමට පිළිවන.

රට තුළ යුක්තිය පසිඳලීමේ ක්‍රියාවලියේ දී කාර්යක්ෂමතාව සහ නීතියේ පිහිට පැතීමේ දී දැරිය හැකි මිල පිළිබඳව සැලකිල්ලට ගතයුතු කාලය එළැඹ තිබේ. රටේ සාමාන්‍ය ජනතාවට ඔවුන්ගේ ආරවුල් කඩිනමින් පහසුවෙන් සහ දැරිය හැකි මිලකට විසඳා ගැනිමට අවස්ථාව තිබිය යුතුය. 

යුක්තිය පසිඳලිම ප්‍රමාදවීම යුක්තිය ප්‍රතික්ෂේපවීමක් ලෙස සැලකේ. එය යුක්තිය පසිඳලීමේ ක්‍රියාවලිය සඳහා උනන්දුවක් දක්වන පාර්ශ්වයන් කලකිරීමට පත් කරයි. එබැවින් ශ්‍රී ලංකාවේ නීති පද්ධතිය ලෝකයේ වඩා හොද ස්ථානයකට පත් කිරීමට අධිකරණය රජය සහ නීති ක්ෂේත්‍රය එක්ව පූර්ණ විසඳුමක් ඉදිරිපත් කිරීමට කාලය එළැඹ ඇතැයි ද ජනාධිපතිතුමා පැවසීය.

විධායකය හෝ ව්‍යවස්ථාදායකය හෝ නීතිමය ක්‍රියාවලියට සහ අධිකරණයට මැදිහත් වුවහොත් එය ප්‍රජාතන්ත්‍රවාදයට හානිකරය. ඒ හා සමානව විධායකයේ සහ ව්‍යවස්ථාදායකයේ ක්‍රියාකාරිත්වයට අධිකරණය අනවශ්‍ය ලෙස මැදිහත් නොවීම ද වැදගත්ය.

Ad Widget

Recommended For You

About the Author: Editor

Leave a Reply

Your email address will not be published. Required fields are marked *