රනිල් ? සජිත්ද ? එය සිරිකොතට මිස රටට අදාල ප්‍රශ්නයක් නොවේ

UNP අර්බුදයට බලි ශාන්තියක් කිරීමට සූදානම් වේ. බලියේ නම ‘නායකත්ව මණ්ඩල අඩව්වය’. ඒ සඳහා කරු ජයසුරිය වෙස් බඳින බවක් අඟහරුවාදා සවස ලංකා ඊ ප්‍රෙස් වාර්තා කළේය. කරු ජයසුරිය යනු දින 51 තුච්ඡ පාවාදීමට අයෝමය ශක්තියෙන් මුහුණ දුන් චරිතය පමණක් නොවේ. සුප්‍රකට නායකත්ව මණ්ඩලය හරහා, 2013 එජාපය ජයග්‍රාහී මානසිකත්වට ළං කළ ක්‍රියාධරයා වේ. ඔහු නායකත්ව මණ්ඩලයේ ප්‍රධානියා වූ නිසාවෙන්  ඌව පළාත් මැතිවරණය කරුගේ හිස මත තැබිණ. එකී මැතිවරණය අවසන් වීම සමග රනිල්  සජිත් එක්ව නායකත්ව මණ්ඩලය විසුරුවා හැරියේ කරුටද නොදන්වා ය.

එජාපයේ සදාචාරය හැදිච්චකම රනිල් වික්‍රමසිංහට තිබුණා නම් යහ පාලන ආණ්ඩුවේ අගමැති බැංකුව කොල්ලය බලා සිටින්නේ නැත.  විරවංශලා, ශීරන්තිලා නීතියෙන් බේරන්නේ නැත.   ඔක්තෝබර් කුමන්ත්‍රණ කාලයේ   සජිත්ලා, මංගල සමරවීරලා, ක්‍රිෂාන්ත කුරේලා හිටියේ සිටියේ ජුදාස් හෙවත් සිරිසේන සමගය. රනිල් හිටියේ බලයට මහින් බලයට ආවත් කමක් නෑ කියන තැනය. 17ක් අරන් පැන්නා කියන  කරු ජයසුරිය නොවන්නට ඔක්තෝබර් සිද්ධිය එසේ අවසන් වන්නේ නැත.

කරු ජයසුරිය  නැවත නායකත්ව මණ්ඩලයකට එකග වේ නම් එය රනිල්ගේ අමුඩයෙන් තම මුහුණ වසා ගැනීමකි.  කරු එදා ආණ්ුඩවට එකතු වුණේ මලික් සිරිසේන අත්සන් කළ ගිවිසුමක අවබෝධයෙනි. ආපසු ආවේ විභාගය සමත්ව ග්‍රාම නිලධාරි පත්විම් වලට තේරුණ එජාප තරුණයන්ගේ නම් කැපීම නිසාය.

අද නැවත රනිල් කරුගේ ආරක්‍ෂාව අපේක්‍ෂා කරයි. 2019 ජනාධිපති අපේක්‍ෂකත්වයට කරුට දෙන ලෙස ඉල්ලීම් ගලා එන විට,  රනිල් කීවේ කරු යනු 17ක් අරන් පැන්න එකා කියාය. 1994 ජනාධිපති මැතිවරණයේ එජාප අපේක්‍ෂක ගාමිණි දිසානායකට එරෙහිව ක්‍රියා කළ රනිල්ට ඒ චෝදනාව 2010දීත් 2019දීද නැවත නැවත මතු විය.

අද වන විට එක්සත් ජාතික පක්‍ෂය නාම මාත්‍රයකි. එය කෙළෙසා විනාස කර අවසානය. භාවිත සිංහලයෙහි  ‘ගැරඬියා කෑවා’ කියන්නේ ආයේ වැඩක් නැත වැනි අරුත් ගැන්වූ යෙදුමකි.

වර්තමාන එජාපය ගැරඩියන් දෙදෙනෙකුගේ හපා කෑමෙන් නිචවූ පක්‍ෂයකි. ඒ  ආර්.ප්‍රේමදාස සහ රනිල් වික්‍රමසිංහ මිස රනිල් සහ සජිත් නොවේ. සජිත් ප්‍රේමදාස සමහරුන්ට මහෞෂධය වී ඇත්තේ රනිල් වික්‍රමසිංහට සාපේක්‍ෂවය.

2015  මහින්දලාගේ උවමනාවට හොර ගිවිසුමක් පෙන්නා 2015 මහින්ද ජනාධපති කිරිමට අංචි ඇද්ද, රෝහිණි විජේරත්න දැක දැක චන්ද්‍රානි බණ්ඩාර මාධ්‍ය සාකච්ඡාවලට තෝරන තිස්ස අත්තනායක අද සජිත්ගේ ද මාධ්‍ය ප්‍රකාශකයා ය. කරු ජයසූරියට 17 අරන් ගියා කියන්නෝ තිස්සගේ බෙල්ලේ එල්ලන්නේ මොකක්ද?  

2015  මහින්දලාගේ උවමනාවට හොර ගිවිසුමක් පෙන්නා 2015 මහින්ද ජනාධපති කිරිමට අංචි ඇද්ද, රෝහිණි විජේරත්න දැක දැක චන්ද්‍රානි බණ්ඩාර මාධ්‍ය සාකච්ඡාවලට තෝරන තිස්ස අත්තනායක අද සජිත්ගේ ද මාධ්‍ය ප්‍රකාශකයා ය. කරු ජයසූරියට 17 අරන් ගියා කියන්නෝ තිස්සගේ බෙල්ලේ එල්ලන්නේ මොකක්ද?  

නායකත්වය පිණිස ඩඞ්ලිට ජේ.ආර්. වින කෙටූ ආර්.ප්‍රේමදාස අන්තිමේ වීදියකදි සමුගත්තේ එජාපයේ ආත්මීය  සාපයෙනි.  තිස්ස, හොර ගිවිසුම් ද, ශිරාල් ලක්තිලකලා සිරිකොතට ගල් ගැසීමද, ප්‍රේමදාස ක්‍රමයේ සාප ලත් ක්‍රියා වෙති. ඔවුන් සමග එජාපය දිනන්නේ නැත. සජිත්, තිස්ස, ශිරාල් තිදෙනාම කලක් රනිල්ගේ නායකත්වයට ජැක් ගැසුවෝ වෙති. ඒ ඉතිහාසය මතක නම් කරු ජයසුරිය රනිල්ට ජැක් ගැසිය යුතු නැත.  

තිස්සලා පිරිවරා සිටින  සජිත්ට එජාපය එක් කළ නොහැකිය.  එළඹෙන මහ මැතිවරණයේදී රනිල් සජිත් දෙදෙනාගෙන් කවුරු එජාප නායකත්වය දැරුවත් එජාප මන්ත්‍රින් විස්සක් තිහක් රාජපක්‍ෂලාට විකිණෙනවාය. එය කෙසේද යත්. ඔක්තෝබර් කුමන්ත්‍රණයේදී සජිත් සිරිසේන සමග සිටියා වාගේය.

එජාපය අද වනවිට පක්‍ෂයක් නොවේ. මතකයක් පමණකි. ඒ මතකය දරාගත් මිනිසුන් සිටින තාක් එජාප මතය කිසිවෙකුට පරාජය කළ නො හැකි ය. එය ශ්‍රී  ලාංකාවේ සාම්ප්‍රදායික චින්තනය ගොනු කළ මහෞෂධය වේ. බණ්ඩාරනායක ඩී.ඒ.රාජපක්‍ෂ දෙදෙනාටම දිය ලණු බැන්දේ එජාපයේ සේනානායකලා විසිනි.  

1988දී ප්‍රේමදාස යනු එජාප නාම යෝජනාව උදුරාගෙන කාගෙක් හයියෙන් ජනාධිපති වි සකල පක්‍ෂයම විනාස කළ හපනා පාරේ මැරුම් කෑ දවසේ රටේ මිනිස්සු කැවුම් කිරිබත් කෑවේ ඒ සාපය නිසාය. ඒ සාප ලත් ප්‍රේමදාස, ගාමිණි ලලිත් දෙදෙනා පන්නා එජාපයේ මුල් පුටුවට රනිල් වික්‍රමසිංහ ආසන්න කිරිමෙන් අදත් එජාපය හතර හන්දි බිඳී අඩපනව ඇත. එජාපය ලක්‍ෂ විසි අටට බැස්සුවේද පනස් ලක්‍ෂයට ඉස්සුවේද ඒ මතකය මිස රනිල් සජිත් හයියට නොවේ.

එහෙත් ලංකා ඉතිහාසයේ එජාපය තරම් විශිෂ්ඨ දේශපාලන පදාර්ථයක් තවත් නැත.  ඒ විශිෂ්ඨ පදාර්ථය තුළ සේනානායකලාගේ මාන්නය, වන්නිනායකලාගේ ඇම්.ඩී.බණ්ඩලාගේ හැදිච්චකම,  ගාමිණි දිසානායකගේ තාරුණ්‍යය සහ උදාරත්වය මෙන්ම  ලලිත් ඇතුලත්මුදලිගේ  බුද්ධිමත් භාවය ගැබ්ව තිබිණ. සේනානායකලා වන්නිනායකලා ඇම්.ඩී.බණ්ඩාලා ජීවත්වන තෙක්ම පක්‍ෂය ආරක්‍ෂා කළහ.

කාලය විසින් නිර්මානය කළ ගාමිණිලා ලලිත්ලා පක්‍ෂයෙන් නෙරපූ ප්‍රේමදාස රනිල් වික්‍රමසිංහ උස්සා තැබුවේ කොන්දේසි විරහිතව නොවන බව හේමා ප්‍රේමදාස  සම්මේලන වේදිකාවට රනිල් කැඳවූ විලාසයෙන් තහවුරු නොවේද?

කාලය විසින් නිර්මානය කළ ගාමිණිලා ලලිත්ලා පක්‍ෂයෙන් නෙරපූ ප්‍රේමදාස රනිල් වික්‍රමසිංහ උස්සා තැබුවේ කොන්දේසි විරහිතව නොවන බව හේමා ප්‍රේමදාස  සම්මේලන වේදිකාවට රනිල් කැඳවූ විලාසයෙන් තහවුරු නොවේද? ලංකාවේ ආර්යාව යන පදාර්ථය විනාස කළ හේමා ප්‍රේමදාසගේ පුතාත් විජේවර්ධනලා නිර්මානය කළ ලේක් හවුසිය විනාස කළ එස්මන්ඞ් වික්‍රමසිංහගේ පුතාත් ඉහතින් කී එජාපයේ විශිෂ්ඨ පදාර්ථයට  එකතු කළේ පරාජය සහ අපකීර්තිය සහ පාක්‍ෂිකයන් අතර වෛරය පමණකි.මේවා කරු ජයසුරිය දත යුතු වේ.

සේනානායකලා , වන්නිනායකලා ඇම්.ඩී.බණ්ඩාලා ජීවත්වන තෙක්ම පක්‍ෂය ආරක්‍ෂා කළහ. 50 හැවිරිදි ගාමිණි දිසානායකද 56 හැවිරිදි ලලිත් ඇතුලත්මුදලිද  එජාපයෙන් පන්නා දැමු ආර්.ප්‍රේමදාස  73 හැවිරිදි ඩි.බි.විජේතුංග අගමැති කළේ එජාපය ගැන සිතා නොවේ. තමන් තුල පැවති වෛරය නිසාය. ඒ වෛරය ආපසු කැරකී බිලි ගත්තේ ප්‍රේමදාසලා පමණක් නොවේ. එජාපයද ඊට බිලි විය. ඒ  විශිෂ්ඨ පක්‍ෂය මත පැහැරූ ප්‍රේමදාසලා රනිල්ලා අද තම ගණුදෙනු බේරාගනු බැරිව මරා ගනිති.  

එන මහ මැතිවරණයේදී රාජපක්‍ෂලාට එරෙහි සටන මෙහෙයවන්නේ මේ දෙදෙනාගෙන් කෙනෙකු ද? ගෝඨාභය ජනාධිපති වී සතියක් තුල ලක්‍ෂමන් කිරිඇල්ල 19 සංශෝධනයට එජාප සහාය දෙන බවට කළ ප්‍රකාශයත්, ජනාධිපති වූ රෑම සිරිසේන ගෝඨාභය හමුවීමක්  එකකි. කිරිඇල්ලලා ගැන මහනුවර අය දන්නා සේම සජිත් ගැන හම්බන්තොට අය දනිති.  

මේ යෝධ පක්‍ෂය කෙලින් කිරිමට පල් හොරුන්ට බැරිය.  2015 තෙක් එජාපයට හොරකම් දූෂණ වංචා චෝදනා නො තිබිණ. එහෙත් මහ බැංකු මංකොල්ලයෙන් රාජපක්‍ෂලාගේ හොරකම් යට ගැසීමෙන් පිරිහුණ, රනිල්ලා රාජපක්‍ෂලා එකම හොරකමේ දෙපැත්ත බව රට දනිති. රනිල් මහින්ද එකම කාසියේ දෙපැත්තය. මේ යුගයේ කරු ජයසුරිය සිටියේ කතානායක පුටුවේය. සියථ තක්කඩිකම් සිදු කළ කැබිනට් එකේ සිටි සජිත් ප්‍රේමදාසද සිටියේය.  

එජාපයට අවශ්‍ය අලුත් කණ්ඩායමකි.  රනිල් සජිත් පුම්බන වාචාලයන්ගේ වහසි බස් තුළ, බංකොලොත් අමන රැළක් මිස, ශක්තිමත් ආණ්ඩුවකට අභියෝග කළ හැකි කිසිවෙකු දැකිය නොහැකිය. රනිල් වාදින්ට වජිර වීරයෙකි. සිල් රෙදි බෙදූ මහින්දගේ අනුෂ පැල්පිට අතිරේක ලේකම් කළ වජිර……? කබිර් හසිම් සජිත් වාදින්ට විරයෙකි. කබිර් හසිම් ගැන කෑගල්ලේ සෝමදාසගේ චෝදනාව…….? වජිරලා කබීර්ලා මෙන්ම පුට්නෝට් අජිත්ලා සුජීවලා සිරිකොත බලි අබාලා මිස අලි බබාලා නොවෙති. කරු ජයසුරිය මේ සිල්ලර අතරට වැටිය යුතු නැත.

අප 1994 සිට 2018 තෙක් 24 වසරක එජාප මැතිවරණ වාර්තා  විමසා බලමු. 1994  එජාප ඡන්ද පදනම 34,98,370 කි. එය 44.04%කි. 2000දී  එය, 34,77,770 ක් හෙවත්  40.22%කි.   2001දී  එය 40,86,026ක් හෙවත්   45.62%කි.    2004දී  එජාප ඡන්ද පදනම 35,04,200 ක් හෙවත්  37.83% කි. 2010දී එජාප ඡන්ද පදනම 23,57,057 ක් හෙවත්   29.34%කි.   2015දී එජාප ඡන්ද පදනම 50,98,927 ක් හෙවත්   45.66%කි. (සුවිශාල වර්ධනයකි.) 2018 අවසන් ඡන්ද ප්‍රතිපලය අනුව, වර්තමාන එජාප ඡන්ද පදනම  36,40,620කි. හෙවත්  29.42%  එජාපය ආයෙත් 2010ට ඇද වැටී ඇත.

මේ 24 වසරින් 18 වසරක් සජිත් ප්‍රේමදාසත් එජාපය නියෝජනය කළා නොවේද? 2015 ජනාධිපති මැතිවරණයේදි පවා සජිත් රාජපක්‍ෂලා වෙනුවෙන් සටන මග හැරියේය. පිරිහුණ එජාපය අවදි කිරිමට අලියා පරණ වැඩිය. උවමනා ඇතෙකි. අද එජාල පොකුණේ අලි ඇතුන් නැත. අලි බෙටි පාවෙති. කරු ජයසුරිය තවත් අලි බෙට්ටක් නොවී සමු ගැනීම යහපත් වේ.

එජාපය තනිව එයි නම් 2019 ලැබූ   41  ලක්‍ෂය 60  ලක්‍ෂයක් කරන්නේ කෙසේද? එජාපයේ  සුථ ජාතික ඡන්ද අතර පාවෙන හකීම්ලාට මනෝ ගනේසන්ලාට අඅමතුවෙන් කළ හැක්කේ කුමක්ද?   1988න් මෙපිට එජාපයට රටෙන් 51%ක් ලැබිලාම නැත. එජාපට තනිව බැහැ කියන්නට තවත් තර්ක අවශ්‍යද?

ගම සජිත්ට කීවාට 2018මෙන්ම 2019දීත් ගම සිටියේ මහින්ද සමගය. සජිත් ප්‍රේමදාස යනු එජාපයේ දියැවෙන තවත් ඉටි පන්දමකි. හිස් කළයක් මිස පුන් කලසක් නොවේ. 51%ක ඡන්ද ඉලක්කය අද ප්‍රධාන පක්‍ෂ දෙකටම ළඟා විය නොහැකි අභියෝගයකි. 2018 පෙරබවාරිදී  අපි දිනුවා කී පොහොට්ටුවට ලැබූණේ 44.65%ක ඡන්ද ප්‍රමාණයකි. රාජපක්‍ෂලාට එරෙහිව 2018 පෙරබවාරියේ ප්‍රකාශිත ඡන්ද ප්‍රමාණය 40.47%කි. සංධානගත නොවී කිසිවෙකුට හෙල්ලෙන්න බැරිය. මෙම විග්‍රහය අනුව 51%ක් දක්වා ප්‍රධාන පක්‍ෂ දෙකටම සංධානගත නොවි තනිව යා නො හැකිය.

එජාපයේ මේ ආරවුල තේරුම් ගත් සමහර එජාප හිතවතුන් ජවිපෙය දෙසට හැරෙමින් සිටිති. ලාල් කාන්ත සමග පෙළ ගැසෙන මහනුවර එජාප ක්‍රියාධරයන් ඊට නිදසුනකි. ඔවුන් තර්ක කරන්නේ රනිල් සජිත් භේදය නිසා පත් වන එජාප මන්ත්‍රීන් රාජපක්‍ෂලාට එක්වන බවය. එය යථාර්ථයකි. විකල්පය ජනතා විමුක්ති පෙරමුණ ද?  ජනතා ඡන්දයෙන් පත්වන ජවිපෙ මන්ත්‍රීන් ආණ්ඩුවට යන්නේ නැත. එහෙත් ඔවුන් පාලනය කරන්නේ දෙහිවලට රැස්වන පොලිට් බියුරෝව විසිනි. සුනාමි සහන මණ්ඩල ආරවුල නිසා ආණ්ඩුවෙන් යන්න ජවිපෙය ගත් තීන්දුවේ ප්‍රතිපල අදත් ඔවුන් භුක්ති විඳිති. පුද්ගලික වෛද්‍ය විද්‍යාල අවශ්‍යය කියන මැදහත් මිනිසුන්  ජවිපෙයට කැමති වේද?  

2005න් පසුව එජාපයට ජනාධිපති අපේක්‍ෂකයෙකු හෝ සොයාගත නොහැකිය. මේ යෝධ පක්‍ෂයට පැවති යෝධ හයිය හත්තිය වැර වීරිය දැන් නැති නිසාය. 2015 තෙක් එජාපයට හොරකම් දූෂණ වංචා චෝදනා නො තිබිණ. එහෙත් මහ බැංකු මංකොල්ලයෙන් රාජපක්‍ෂලාගේ හොරකම් යට ගැසීමෙන් පිරිහුණ, එජාපය රාජපක්‍ෂලා විසිවුණ කුණු බක්කියට වැටී හමාරය. විවිධ හේතු නිසා එජාප ඡන්ද පදනම දෙදරා ගොස්  ය. 2019 ප්‍රතිපල කියන්නටත් පළමුව සජිත් ප්‍රේමදාසගේ කකුල් පන නැති විය.

රනිල්ද…? සජිත්ද…..?  එය සිරිකොතට  මිස  රටට අදාල ප්‍රශ්නයක්  නොවේ. එජාපය මේ ප්‍රශ්නය ගන්නා තාක් මේ රට රාජපක්‍ෂලාගේ නින්දගමක් වනු නිසැකය. රාජපක්‍ෂලාගෙන් රට බේරා ගැනීම හෝ  රාජපක්‍ෂලාගෙන් ගෝඨාභය බේරා ගැනීම එළඹෙන යුගයේ විපක්‍ෂ කාර්ය භාරය වන්නාහ. ඒ සඳහා අවශ්‍ය අලි ඔලු නොවේ. ජන ශක්තියකි. ඒ ශක්තිය ඒකරාශීවන තැනකට කරු ජයසුරියට ආසන්න විය නොහැකිද? රනිල් මෙන්ම සජිත්ද ශක්තිමත් මිනිසුන් සමග වැඩ කිරිමට බියෙන් පසුවෙති. ඒවා ජානගත දුර්වලකම්ය. නීතිඥ චන්ද්‍රසිරි සෙනෙවිරත්න විසිනි.

නීතිඥ චන්ද්‍රසිරි සෙනෙවිරත්න විසිනි

Ad Widget

Recommended For You

About the Author: Editor

Leave a Reply

Your email address will not be published. Required fields are marked *