කොරෝනා වෛරසය රටට ඇතුළුවීම වැළැක්වීමට විද්‍යානුකූල ක්‍රමවේදයක්

කොරෝනා වෛරසය රට තුළට පැමිණීම නතර කිරීමට නිසි විද්‍යානුකූල ක්‍රමවේදයක් අනුගමනය කරන්නැයි ජනාධිපති ගෝඨාභය රාජපක්ෂ මැතිතුමා කොරෝනා මර්දන කාර්ය සාධක බලකායෙන් ඉල්ලා සිටී.

රජය හා සෞඛ්‍ය ක්ෂේත්‍රයේ විශේෂඥයන් මුල සිට ගත් ක්‍රියාමාර්ග නිසා කලාපයේ කොරෝනා වෛරසයට සාර්ථකව මුහුණ දුන් රටක් බවට ශ්‍රී ලංකාව පත්ව ඇතැයි ජනාධිපතිතුමා පවසයි.  ඉදිරියටත් එම තත්ත්වය පවත්වා ගැනීමට ගතයුතු පූර්ව ක්‍රියාමාර්ග සොයා බැලීමට අද (06) දහවල් ජනාධිපති කාර්යාලයේ පැවති සාකච්ඡාවේ දී ජනාධිපතිතුමා මේ බව සදහන් කළේය.

ඉරානය, දකුණු කොරියාව සහ ඉතාලිය යන රටවල කොරෝනා වෛරසය සීග්‍රයෙන් පැතිරයමින් පවතී. එම රටවල සිට මෙරටට පැමිණෙන අය දින 14 කාලයක් නිරෝධායනයට ලක් කළයුතු බව කාර්ය සාධන බලකාය ජනාධිපතිතුමාට නිර්දේශ කළේය. එමගින් කොරෝනා වෛරසය පැතිරීමේ බලපෑමට ලක් නොවූ රටක් ලෙස ශ්‍රී ලංකාවට තවදුරටත් ක්‍රියාකළ හැකි බව සාමාජිකයෝ පෙන්වා දුන්හ.

දැනටමත් සමස්ත දිවයින ආවරණය වන පරිදි රෝහල් රැසක සැක සහිත රෝගීන් සාර්ථකව නිරෝධායනය කෙරේ.  කොරෝනා ආසාධිත  කිසිදු ශ්‍රී ලාංකිකයෙක් රට අභ්‍යන්තරයෙන් හමු වී නැත. විදෙස්ගතව සිට  පැමිණෙන ජනයාට යම් රෝග ලක්ෂණයක් ඇත්නම්  සැඟවී නොසිට සමාජයීය වගකීමෙන් ක්‍රියා කිරීම යුතුකමක් බව ජනාධිපතිතුමා සඳහන් කළේය.

රෝගය බෝවීම වැළැක්වීමට ගන්නා සෞඛ්‍යමය ක්‍රියාමාර්ග මාධ්‍ය මඟින් නිරන්තරයෙන් ප්‍රචාරය කිරීමේ අවශ්‍යතාව ද ජනාධිපතිතුමා පෙන්වා දුන්නේය. ඉදිරියේ දී නිරෝධායන ක්‍රියාවලිය ඇරඹීමට සිදුවුවහොත් ඒ සඳහා අවශ්‍ය ස්ථාන, සම්පත් දායකයන්, පහසුකම් සහ උපකරණ සපයා දීමට විධිමත්ව සූදානම් වන ලෙස ද උපදෙස් දෙනු ලැබිණ.

බස්නාහිර පළාත් ආණ්ඩුකාර වෛද්‍ය සීතා අරඹේපොල, ජනාධිපති ලේකම් ආචාර්ය පී.බී. ජයසුන්දර, සෞඛ්‍ය ලේකම් භද්‍රානී ජයවර්ධන, සෞඛ්‍ය සේවා අධ්‍යක්ෂ ජනරාල් වෛද්‍ය අනිල් ජාසිංහ යන මහත්ම මහත්මීහූ සහ කෙරෝනා මර්දන කාර්ය සාධක බලකායේ සාමාජිකයෝ  සාකච්ඡාවට එක්ව සිටියහ.

Ad Widget

Recommended For You

About the Author: Editor

Leave a Reply

Your email address will not be published. Required fields are marked *