රවී කොටු කිරීම පිටුපස ‘පරපුටුවා සහ පරපුටු උපදේශකයා’ හොල්මන් කරලා

බැඳුම්කර ගනුදෙනුව සම්බන්ධ ජනාධිපති කොමිසමේ වාර්තාව නිකුත් වූ අවස්ථාවේ හිටපු ජනාධිපති සිරිසේන තමන්ගේ නම ඊට ඈඳා ප්‍රශ්නයක් ඇතිකළ බවත් 2017 ඒ සම්බන්ධව සිදුකළ ප්‍රශ්න කිරීමට අද වනතුරු උත්තරදී නොමැති බවත් හිටපු පාර්ලිමේන්තු මන්ත්‍රී රවී කරුණානායක කියයි.

ඊයේ (04) මාධ්‍ය වෙත විශේෂ ප්‍රකාශයක් නිකුත් කරමින් රවී කරුණානායක මේ බව සඳහන් කළ අතර ප්‍රශ්නගත සිදුවීම සිදුවන විට තමන් මුදල් ඇමති ලෙස කටයුතු කළ නමුත් බැංකු හෝ මහ බැංකුව යන කිසිවක් තම විෂය පථය යටතේ නොතිබූ බවත් පෙන්වා දුන් කරුණානායක මහතා මේ සිදුකර ඇත්තේ ජන්දය ආසන්නයේ එක්සත් ජාතික පක්ෂයට, ජනතාවට සහ තමන්ට එරෙහි කුමන්ත්‍රණයක් බවත් පැවසීය.

හිටපු ජනාධිපති මෛත්‍රීපාල සිරිසේනට මෙහි වගකීමක් ඇති බව පැවසූ කරුණානායක මහතා කිසිදු විමර්ශනයක තමන්ට චෝදනා කර නොමැති බවත් පෙන්වා දුන්නේය.

මේ අතර නීතිපතිවරයා විසින් තමා ඇතුළු 12 දෙනකු වහාම අත්අඩංගුවට ගන්නා ලෙස වැඩබලන පොලිස්පතිවරයාට නිකුත් කළ වරෙන්තුව ගැන අදහස් දක්වමින් රවී කරුණානායක මහතා සදහන් කළේ පාර්ලිමේන්තුව විසුරුවා මහ මැතිවරණයක් කැඳවා ඇති අවස්ථාවක වරෙන්තු ගෙන අත්අඩංගුවට ගන්නා ලෙස නියෝග නිකුත් වීම දැඩි ප්‍රහේලිකාවක් බවයි.

මේ අතර හිටපු ජනපතිවරයාට සමීප ආරංචි මාර්ග දක්වන්නේ රවී කරුණානායක මහතාට එරෙහිව ජනපතිවරයා කුපිත කිරීම පිටුපස කලක් එජාප සමග කටයුතු කළ ජනාධිපති උපදේශකවරයෙකු සිටින බවයි. ඔහුගේ පුද්ගල කෝන්තරයක් මත පසුගිය ආණ්ඩු සමය පුරාම හිටපු ජනපති සිරිසේන රවී කරුණානායක මහතාව පීඩනයට පත් කළ බව ද එම ආරංචි මාර්ග සදහන් කරයි.

සිරිසේන පසුගිය දා පොළොන්නරුවේදී සිදුකළ ‘උකුසු’ කතාව මේ සමග ගෙන කතා කිරීමට කැමැති දේශපාලන විචාරකයින් බොහෝ දෙනකු සදහන් කළේ තමා උකුස්සෙකු යැයි සිරිසේන සිතා සිටියත් ඔහු සැලකිය හැකිකේ පරපුටුවෙකු වශයෙන් බවයි.

මාදුලුවාවේ සෝභිත හිමියන් ඇතුළු සිවිල් සමාජය විසින් ද එජාපය හා ජනතා විමුක්ති පෙරමුණ විසින් ද නිර්මාණය කළ රාජපක්ෂ විරෝධය හමුවේ ජනපති ධුරයට පත් සිරිසේන ජනාධිපති වූ දා සිටිම යහපාලන ආණ්ඩුව නම් කූඩුවේ ශ‍්‍රීලනිප පැටව් පෝෂණය කිරීමට තැත් කළ බව පෙන්වා දෙන ඔවුන් එජාප ආණ්ඩුවේ සියලුම සංවර්ධන කටයුතුවලට (සජිත් හැර) අඛණ්ඩව බාධා කළ බවත් ඔහුගේ පරපුටු න්‍යාය අනුව පොළොන්නරුවට සියල්ල කළ බවත් පෙන්වා දුන්නේය.

මොරගහකන්ද, පිබිදෙමු පොළොනන්රුව ඇතුළු එදා යහපාලන ආණ්ඩුව සමයේ සිදුකළ සියලු සංවර්ධන වැඩවල ලකුණු දා ගන්න අද සිරිසේන කැසකවන බව පෙන්වා දෙන දේශපාලන විචාරකයෝ එදා යහපාලන ආණ්ඩුව සමයේ සිදුකළ සංවර්ධන කටයුතුවල (පොළොන්නරුවට) තනි බුක්තිය සිරිසේන විසින් ලියා ගෙන මහ මැතිවරණයට ඉදිරිපත්ව ඇති බව පෙන්වා දුන්නේය. මෙය උකුසු න්‍යාය නොව පැහැදිලිව පරපුටු න්‍යාය බව ද අවධාරණය කරන ඔවුහු පොළොන්නරුවේ ජනතාව මේ පරපුටුවා ගැන පැහැදිලි දේශපාලන තීන්දුවක් ගත යුතු බව ද පෙන්වා දුන්නේය.

මේ සම්බන්ධයෙන් අදහස් දැක්වූ පොහොට්ටුවේ තරුණ ඇමැතිවරයෙකු පෙන්වා දුන්නේ රාජපක්ෂ පවුලට සහ පොහොට්ටුවට අපමණ කෙනෙහිලිකම් කළ මේ පුද්ගලයා යළි පොහොට්ටුවේ අපේක්ෂකත්වය ඉල්ලා සිගමනේ ඒක දෛවයේ සරදමක් බවයි. එනිසා ඉතාම පැහැදිලිව 2015 මහ මැතිවරණයේදී බුද්ධිමත් ඡුන්ද දායකයින් ගත් තීන්දුව ඔවුන් මෙවර ද ගනු ඇති බවට විශ්වාස යැයි ද පරපටුවන්ට පොහොට්ටුව තුළ බිජු ලෑමට තමන් ඇතුළු පාක්ෂිකයින් කිසිසේත් ඉඩ ලබා නොදෙන බව ද අවධාරණය කළේය.

Ad Widget

Recommended For You

About the Author: Editor

Leave a Reply

Your email address will not be published. Required fields are marked *