49 වන අප්‍රේල් විරු සමරුව: වයිරස් රෝගයකටවත් සාර්ථකව මුහුණ දෙන්න ධනවාදයට බැහැ – ටිල්වින් සිල්වා

වඩා යහපත් සමාජයක් නිර්මාණය කිරීම වෙනුවෙන් 1971 විරුවන් දිවිපුදා ආරම්භ කළ අරගලය දේශපාලනය මර්දනයෙන් පවා පරාජය කළ නොහැකිව අදත් අපට මග පෙන්වන පහන් ටැඹවල් බවට පත්වී තිබෙනවා. ඔවුන් හැම විටම අපේ හදවත් තුළ ජීවත්වෙමින් වත්මන් දේශපාලනයට ධෛර්යය, ශක්තිය ආදර්ශ ලබාදෙනවා.

රට තුල පවතින විශේෂ තත්වය නිසා ජනතා විමුක්ති පෙරමුණේ 49වැනි අප්‍රේල් විරු සමරුව මෙවර ෆේස්බුක් මගින් සජීවි විකාශයක් ලෙස සිදුකරන ලදී. මේ අවස්ථාවට ජවිපෙ නායක අනුර දිසානායක සහ ටිල්වින් සිල්වා සහභාගි වූ අතර සමරු දේශනය සිදුකරන ලද්දේ පක්ෂ ලේකම්වරයා විසිනි. රටපුරා සිටින සහ විදෙස්ගතව සිටින ජවිපෙ සාමාජිකයින් ෆේස්බුක් ඔස්සේ මෙම අවස්ථාවට සජීවීව සම්බන්ධ විය.

අපි අද අන්තර්ජාලය ඔස්සේ සජීවීව එකතුවෙලා ඉන්නේ මීට අවුරුදු 49කට පෙර අද වගේ දවසක අයුක්තියට, අසාධාරණයට එරෙහිව නව සමාජ ක්‍රමයක් වෙනුවෙන් සටන් කොට දිවිදුන් පරපුරක ආදරණීය සහෝදර සහෝදරියන් සැමරීම සඳහායි.

අපි කුමණ පක්‍ෂයක හිටියත් අපේ පක්‍ෂයේ ආරම්භක පරපුරේ දිවිදුන් සහෝදර සහෝදරියන් අනුස්මරණය කිරීම, ඔවුන්ගේ අත්දැකීම් එකතුකර ගැනීම හා ඔවුන් මඟපෙන්වූ නව සමාජයක් නිර්මාණය කිරීමේ කාර්ය සඳහා ධෛර්ය එකතුකර ගැනීම වෙනුවෙන් අප්‍රේල් විරුවන් අනුස්මරණය කරලා තියෙනවා. වනගතව සිටියදී, සිරගතව සිටියදී පවා සිදුකළ අනුස්මරණය හැකි අවස්ථාවලදී විශාල පිරිසක් එකතු කරගෙන සිදුකළා.

මෙවර කොවිඞ් 19 වසංගත තත්වය නිසා අප්‍රේල් විරු සමරුව විශාල පිරිස් එකතු කරගනිමින් ප්‍රසිද්ධ ස්ථානයක සිදුකරන්න බැරිවී තිබෙනවා. ඒ නිසා අන්තර් ජාලය ඔස්සේ සහෝදර සහෝදරියන් සම්බන්ධ කර ගනිමින් කෙටි සැමරුමක් සිදුකරනවා. 

1971 අරගලයේදී දිවි පිදූවන් සැමරීමට හේතු ගණනාවක් තිබෙනවා. මේ අරගලයේදී අපේ සහෝදරුවන් දිවි පිදූවේ ඉතාම පවිත්‍ර පොදු අරමුණක් වෙනුවෙන්. ඔවුන් සටන් කළේ ජාතිවාදය, ආගමික අන්තවාදයක් වෙනුවෙන් නෙවෙයි. වෙනත් ප්‍රතිගාමී අරමුණක් වෙනුවෙන් නෙවෙයි. මානව වර්ගයාට විමුක්තිය ලබාදීමේ, මිනිස්සුන්ට මිනිස්සු වශයෙන් ජීවත්වෙන්න පුළුවන් සාධාරණ සමාජයක් වෙනුවෙන් තමන්ගේ දේශපාලන අයිතිය වෙනුවෙන් ඔවුන් සටන් කළා. පවතින අයුක්තිසහගත ධනවාදී ක්‍රමය වෙනස් කරලා සමාජවාදී සමාජයක් නිර්මාණය කරන්න, නිර්ධන පංතියට දේශපාලනය කිරීමේ අයිතිය වෙනුවෙන් සටන් කොට ඔවුන් දිවි පිදුවා. ඒ නිසාම ඔවුන් හැමදාමත් අපේ පරමාදර්ශයන් බවට පත්වී ඉන්නවා. 

අපේ පක්‍ෂයේ ආරම්භක පරපුරේ සහෝදර සහෝදරියන් 1971 අරගලයේදී දිවිපුදා දැන් සියවස් බාගයකට ආසන්න වී තිබෙනවා. ගෙවීගිය අවුරුදු 49 දෙස බැලීමේදී ඉතිහාසය විසින් ඔවුන්ගේ අරගලය සාධාරණ බව යළි යළිත් ඔප්පු කරමින් ඉන්නවා. ඔවුන් සමාජවාදය වෙනුවෙන් දිවිපුදා වසර 50කට ආසන්න කාලයක් ගෙත වෙන මොහොතේ ධනවාදයට අපේ රටේ කිසිම ප්‍රශ්නයක් විසඳන්න බැරිවූ බව ඔප්පුකරමින් ඉන්නවා.

ලෝකයේ කිසිම ප්‍රශ්නයක් විසඳන්න බැරි බව ඔප්පුකරමින් තිබෙනවා. ලෝක පරිමාණයෙනුත් ධනවාදය අර්බුදයට ගිහිල්ලා. ලෝකයේ උපදින දරුවන්ට අත්‍යාවශ්‍ය මූලික පහසුකම්, අධ්‍යාපනය, සෞඛ්‍යය ලබාදෙන්න බැරිවෙලා. තරුණවියට පත්වුණාට පස්සේ රැකියා ලබාදෙන්න බැරිවෙලා. තනි වචනයෙන් ගත්තොත් මිනිසෙකුට ජීවත්වෙන්න පුළුවන් විදිහේ පරිසරයක් නිර්මාණය කරන්න ධනවාදයට බැරිවෙලා. අසාධාරණය, අයුක්තිය, ලෙඩරෝග, සාගත යුද්ධ මිනිස් ඝාතන, ජාතිවාදී හා ආගම්වාදී ගැටුම් මිනිසා එකිනෙකාට එරෙහිව අවි ඔසවාගැනීම් තමයි ධනවාදය ලබාදී තිබෙන්නේ.

වඩා යහපත් සමාජයක් නිර්මාණය කිරීම වෙනුවෙන් 1971 විරුවන් දිවිපුදා ආරම්භ කළ අරගලය දේශපාලනය මර්දනයෙන් පවා පරාජය කළ නොහැකිව අදත් අපට මග පෙන්වන පහන් ටැඹවල් බවට පත්වී තිබෙනවා. ඔවුන් හැම විටම අපේ හදවත් තුළ ජීවත්වෙමින් වත්මන් දේශපාලනයට ධෛර්යය, ශක්තිය ආදර්ශ ලබාදෙනවා. ජනතා විමුක්ති පෙරමුණ ජනතාවට ලබාදෙන දේශපාලන ආදර්ශයේ උල්පත බවට පත්වී තිබෙන්නේ 71 දිවිපිදූ සහෝදර සහෝදරියන්. 

ධනවාදය අසාර්ථක බවත් සමාජවාදය සාර්ථකත්වයන් ලෝකයට පෙන්වා දෙන බවත් ඔප්පු වෙමින් තිබෙනවා.

මුළු ධනපති, අධිරාජ්‍යවාදී ලෝකයම කොරෝනා වසංගත තත්වය හමුවේ අසරණ වෙලා. මෙයින් තහවුරු කරමින් තිබෙන්නේ ධනවාදයට හෝ අධිරාජ්‍යවාදයට රෝගයක් සමඟ පවා හැපෙන්න පුළුවන්කමක් නැහැ කියලා. මිනිසා යනු සාමූහිකව ජීවත් විය යුතු පිරිසක්. ඔවුන් වෙන්කර හුදකලා කරන්නේ ධනපති ක්‍රමයයි. අධිරාජ්‍යවාදය අසමත්වීමේ ප්‍රමාණය ප්‍රදර්ශනය කරමින් අද වෙනකොට කොරෝනා ඉදිරියේ තව දුරටත් මිනිසුන් හුදකලා කරමින් තිබෙනවා.

අධිරාජ්‍යවාදයේ මුදුන් මල්කඩ වන ඇමරිකා එක්සත් ජනපදය අද ඉතාම කණගාටුදායක තත්වයකට පත්වෙලා. පසුගිය සියවසකට ආසන්න කාලයක් තිස්සේ ඇමරිකාව නිර්මාණය කළ සමාජය රෝගයක් ඉදිරියේ අසරණ වෙලා. විද්‍යාවේ, තාක්‍ෂණයේ මහා දියුණුවක් එක්සත් ජනපදය අත්පත් කරගත්තත් ඒ ජයග්‍රහණ භාවිතා කළේ මිනිස්සු ජීවත් කරවන්න නෙවෙයි මිනිස්සුන්ව යටපත් කරවන්නයි; මිනිස්සුන්ව ඝාතනය කරන්නයි. මුළු ලෝකයක් ආක්‍රමණය කළහැකි මට්ටමේ අවි ආයුධ තැනුවා. අධිවේගී ප්‍රහාරක යානා නිර්මාණය කළා. නමුත් අපි මේ කතා කරන මොහොත වනවිට තුන්ලක්ෂ එකළොස්දාහකට අධික රෝගීන් සංඛ්‍යාවක් වාර්තා වෙනවා. 

එක්සත් ජනපදය ලෝකයේ වේගයෙන්ම රෝගය ව්‍යාපත්වන රට බවට පත්වෙලා තියෙනවා. ඒ වගේම ඉතාලිය, ස්පාඤ්ඤය වගේ යුරෝපීය රටවල වැඩිම මිනිස්සුන් පිරිසක් මේ රෝගයෙන් මිය යනවා. ඒකෙන් පැහැදිළි වෙන්නේ ධනවාදයට මේ වසංගතය පාලනය කරන්න නොහැකිවී තිබෙන බවයි.

එක්සත් ජනපදය හිතාගෙන හිටියේ මේ ලෝකයේ ඔවුන්ට කරන්න බැරි කිසිවක් නැහැ කියලා. ඔවුන් පහුගිය කාලය පුරාම නිර්මාණය කළේ මිනිසුන් සුවපත් කරන දේවල් නෙවෙයි, මිනිසුන් ඝාතනය කරන අවි ආයුධ. මිනිසුන් ඝාතනය කරන අවි ආයුධ දියුණු කරගත්තා මිස අසනීපයකින් මිනිසුන් සුවපත් කරන සෞඛ්‍ය සේවයක් ඔවුන් දියුණු කරගත්තේ නැහැ. අද එහි ප්‍රතිවිපාක ඔවුන් බුක්ති විඳිනවා. රෝගී වන අයට ප්‍රතිකාර ගන්න තියෙන්නේ සෞඛ්‍ය රක්‍ෂණයක්. රක්‍ෂණයේ මුදල් අවසන් වුණාම ප්‍රතිකාර නතර වෙනවා. රටේ සුපිරි ධනපතීන් කල් ඇතිව රෝහල් කාමර වෙන්කරගෙන. සාමාන්‍ය ජනතාවට යන්න තැනක් නැහැ. ඒ විතරක් නෙවෙයි ව්‍යසනය වෙලාවෙත් මනුෂ්‍යත්වය නැති හැසිරීමකුත් ප්‍රදර්ශනය කරනවා. එනිසා සමාජවාදයේ වටිනාකම සහ අවශ්‍යතාවය මේ රෝගයෙන් පවා ඔප්පුවී තිබෙනවා. 1971 අරගලයේ දිවි පිදූ සහෝදර සහෝදරියන්ගේ අරමුණු අපට මේ මොහොතේ වටින්නේ ඒ නිසයි. අද අත්දකිමින් තිබෙන්නේ නව සමාජය ගොඩනගන්න අසමත්වීමේ පීඩාවයි.

ලෝකය පුරා ව්‍යාප්තවන වසංගතය කිසියම් ප්‍රමාණයකින් හෝ පාලනය කරගැනීමේ හැකියාව අත්පත් කරගෙන තිබෙන්නේ සමාජවාදී රටවල්. සමාජවාදී රටවල ජයග්‍රහණ ගැන කතා නොකර හිටපු අයට පවා දැන් කතාකරන්න සිදුවෙලා. චීනය ඉතා ඉක්මනින් මේ තත්වය පාලනය කරන්න සමත් වෙනවා. චීනය ඉක්මවා සැතපුම් දහස් ගණන් ඈත රටවලට රෝගය පැතිරී යද්දීත් තමන්ගේ රටේ සමහර ප්‍රාන්ත බේරාගන්න හැකි වුණා. චීනයේ සමාජවාදය පිළිබඳව ගැටළු, විවේචන තිබෙන බව අපි දන්නවා. එරට සියලු දේ අනුමත කරන්න නොහැකි නමුත් චීන සමාජවාදය සහ ජනතාව වයිරසය පාලනය කරගැනීමේදී දැක්වූ සමත්කම අවතක්සේරු කරන්න බැහැ. කොමියුනිස්ට් පක්‍ෂයේ සමාජවාදී මධ්‍යගත යාන්ත්‍රණය, ජනතාවගේ විනය සහ කැපවීම නිසා මෙවැනි තත්වයක් සමග සටන්කිරීමේ හැකියාව තිබෙන බව ඔප්පුකළා. 

සමාජවාදී කියුබාවත් මේ බව ඔප්පුකර තිබෙනවා. ඇමරිකාව කියුබාව යටත් කරගන්න හමුදා මෙහෙයවද්දී කියුබාව ඖෂධ නිෂ්පාදනය කළා. ලෝකයේ මිනිස්සුන් ජීවත් කරවන්න වෛද්‍යවරුන් බිහිකළා. ඇමරිකාවත් කියුබාවත් දෙස බැලුවාම සමාජවාදය සහ ධනවාදය ගැන වෙනස දකින්න පුළුවන්.

මේ වෙලාවේ රුසියාව තුළ පවා රෝගය පාලනය කරගැනීමේ සමත්කම තිබෙන්නේ වත්මන් රුසියාවේ හැකියාව නිසා නෙවෙයි. කාලයක් පැවතුණු සෝවියට් සමාජවාදී හැකියාවන් නිසයි. ආත්මාර්ථකාමයෙන් පිරිච්ච, විනයක් නැති සියල්ල මුදල් මත තීරණය කරන ධනවාදයට මෙවැනි තත්වයන් පරාජය කරන්න බැහැ කියන බව ඔප්පු කරමින් තිබෙනවා.

අපි කරන අරගලයේ වැදගත්ම තියෙන්නේ, අපි කරන කාර්යභාරය වඩාත් ධෛර්යයෙන් කරන්න පොළඹවන්නේ මේ උදාහරණවලින්. තමන් විශ්වාසය කරන සත්‍යය වෙන්නේ ඕනෑම කැප කිරීමක් කරන්න පුළුවන් බව අපට කියා දුන්නේ 71 අරගල කළ අපේ සහෝදරවරුන්, සහෝදරියන්. ඒ නිසා ඔවුන්ට හිස නමා ආචාර කරන්න ඕනෑ. 

දුෂ්කරතාවයට පත් ජනතාව පෙන්වා ආණ්ඩුව ප්‍රජාතන්ත්‍රවාදී ආයතන නොසලකා කටයුතු කරනවා

කොරෝනා වසංගතය සමග අපේ රටේ තත්වය මග ඇරලා දේශපාලනය කරන්න පුලුවන්කමක් නැහැ. අපේ රටේ ජනතාව විශාල බියකින් සහ දුෂ්කරතාවයකින් ඉන්නේ. දවස් ගණානවක් තිස්සේ ඇඳිරිනීති තත්වයක් තුළ අත්‍යාවශ්‍ය බෙහෙත් වර්ග, ආහාර ලබාගත නොහැකිව විශාල දුෂ්කරතාවයකට මුහුණදීලා. මෙතරම් කැපකිරීමක් කරන්න ජනතාවට සිද්ධ වුණේ ඇයි? අපේ රටේ පාලක පංතියේ තිබුණු දැක්මේ අඩුපාඩුව නිසයි.

මේ වගේ විපතකදී අපි හැමෝම එකතු වෙලා කොරෝනා පරද්දමු කියන එකයි කාගෙත් ප්‍රාර්ථනාව. ඒ වෙනුවෙන් ජනතා විමුක්ති පෙරමුණට කරන්න පුළුවන් හැම දේම අපි කරමින් ඉන්නවා. ඉදිරියටත් එහෙමයි.

ඒ අතර පාලක පංතිය ගත් ක්‍රියාමාර්ගවල දුබලතා අමතක කළ යුතු නැහැ. අපේ රට දූපතක් නිසා මේ රෝග වාහයකයන් රටට ඇතුල් විය හැකිව තිබුණේ ගුවන්තොටුපොළ සහ වරායවලින්. නමුත් වර්තමාන පාලක කණ්ඩායම් රෝගය පාලනය කිරීම ගැන කල්පනා කරනවා වෙනුවට බලය වෙනුවෙන් ඕනෑම දෙයක් කිරීම ගැන කල්පනා කරමින් මැතිවරණය ඉදිරියට ගෙනාවා. පාර්ලිමේන්තුවට අගෝස්තු දක්වා කල් තියෙද්දී පාර්ලිමේන්තුව විසුරුවා හැරියා. ගුවන් තොටුපොළ පාලනය නොකිරීම නිසා විදේශගතවී සිට පැමිණි ඇතැම් පිරිස් රෝග නිරෝධායනයකින් තොරවම රට තුළට ආවා.

රෝගය අපේ රටටත් පැතිරෙමින් තිබෙන වෙලාවක වර්තමාන ජනාධිපතිරයා සාක් නායකයින් සමග අන්තර්ජාලය ඔස්සේ සිදුකළ සාකච්ඡාවේදී පවා අවධාරණය කළේ මැතිවරණය පවත්වන බවයි. සෞඛ්‍ය ඇමතිවරිය කිව්වෙත් ඒකයි. රෝගය පැත්තකට දාලා ඉක්මනින් ඡන්දය දිනාගන්නයි කල්පනා කරමින් හිටියේ. 

ඡන්ද වෙනුවට රෝගය පාලනය කීරීම ගැන පාලකයන් හිතුවා නම් ජනතාව මේ තරම් පීඩාවකට පත් නොකර කටයුතු කරන්න තිබුණා. රෝගය පැතිරෙමින් තිබියදී පාර්ලිමේන්තුව විසුරුවා හැරපු ගැසට් පත්‍රය අවලංගු කිරීමේ හැකියාව ජනාධිපතිට තිබුණා. නමුත් ඡන්දය පැවැත්වීම කල්දාන තීන්දුව ගත්තේ මැතිරවණ කොමිසමේ සභාපතිවරයයි.

ජනාධිපතිවරයා කොරෝනා සම්බන්ධයෙන් පැහැදිලි කරන්න ජාතිය අමතා කළ කතාවේදී කිව්වෙත් මහින්ද රාජපක්‍ෂ අගමැතිවරයා ප්‍රමුඛ ආණ්ඩුවක් හදාගන්න බලය දෙන්න කියලා. ජනතාව ගැන නොසිතා බලය ගැන පමණක් සිතමින් කටයුතු කරනවා. ජාතිවාදය ආගම්වාදය පැත්තක තියලා ප්‍රජාවක් ලෙස එකට කටයුතු කරනවා වෙනුවට තමන් අතේ බලය තියාගෙන දේශපාලන මෙහෙයවීම් කරන බව පැහැදිලියි. මේ වෙලාවේ ව්‍යවස්ථා අර්බුදයකුත් මතුවෙමින් තිබෙනවා. ලබන ජූනි මාසයේ දෙවැනිදා වෙනකොට පාර්ලිමේන්තුව රැස්කර ගැනීමේ ව්‍යවස්ථාමය අවශ්‍යතාවය තිබෙනවා. 

දුෂ්කරතාවලට පත්වී ඉන්න ජනතාවට සහන සලසන කාර්යය පවා තමන්ගේ දේශපාලන පක්‍ෂයේ ප්‍රාදේශීය නායකයෝ හරහා කරගෙන යන මැතිවරණ ව්‍යාපාරයක් ඉදිරියට ගෙනල්ලා. මහජනතාවගේ මුදලින් කරන කටයුතු පවා යොදාගන්නේ රෝගය පාලනය කිරීමට වඩා බල ලෝභය වෙනුවෙන්. කොරා්නා වසංගතය පාලනය කිරීමේ ක්‍රියාමාර්ග නිසා පීඩාවට පත්වන ජනතාව පාවිච්චි කරලා ක්‍රමානුකූලව ප්‍රජාතන්ත්‍රවාදය, ව්‍යවස්ථාව, පාර්ලිමේන්තුව පැත්තක තියලා ඒකාධිපති පාලනයක් ගෙනයාමේ කැමැත්තක් තිබෙන බව පැහැදිලි වෙනවා.

මේ පාර්ලිමේන්තුව අපේ එකක් නෙවෙයි. අද පාර්ලිමේන්තුව මගහැරලා යන්නේ වමේ ව්‍යාපාර නෙවෙයි ඔවුන්ම හදා ගත්තු නීති-රීති ව්‍යවස්ථා රකින්න අසමත්වූ ධනපති පාලකයන්මයි. ධනවාදී අර්බදය සහ බලලෝභය නිසා ඔවුන්ගේ පාරලිමේන්තුව කැඳවන්න අකමැතියි. අද අපේ රටේ පාර්ලිමේන්තු පමණක් නොව අගමැතිවරයා පවා අක්‍රීයයි. ජනාධිපතිවරයාත් ඔහු වටා සිටින කිහිප දෙනෙකුගේ කල්ලියක් පාලනය ගෙනයන බව පැහැදිලිවී තිබෙනවා. 

කොරෝනා වසංගතය පැරද්දීමෙන් පසු අපි ඉදිරියේ තිබෙන්නේ ඒකාධිපති පාලකයෙක් බිහිකර ගැනීමේ තත්වයක් නම් අප කළ යුත්තේ කොරෝනා වසංගතය පැරැද්දීමට දරන කැප කිරීමම ඒකාධිපතිත්වය පැරදවීමට යෙදවීමයි. අපි ඒ වෙනුවෙන් මැදිහත්වීමට සූදානම්. අපේ රට කොරෝනා ව්‍යසනයෙන් මුදාගන්නා අතරම නිර්මාණය වෙමින් තිබෙන ජනතාවට අහිතකර දේශාපලන තත්වයන් හඳුනාගැනීමත් එය පරාජයට පත්කිරීමේ ක්‍රියාමාර්ගත් අනුගමනය කිරීමත් අපි කාගේත් වගකීමක්.

ගං වතුරක්, නායයාමක් ස්වභාවික ආපදාවක් වගේ නොවන වෛරස් වසංගතයක් හමුවේ අපිට මැදිහත්වීමේ සීමාවක් තිබෙනවා. ඒ සීමාව තේරුම් ගනිමින් ජනතාවගේ අවශ්‍යතා ඉටු කරන්න ජනතා විමුක්ති පෙරමුණේ රතු තරුව සහන සේවා කණ්ඩායම මැදිහත්වී තිබෙනවා. ආණ්ඩුවේ සහන කටයුතු රූපවාහිනී සංවාද, මාධ්‍ය නිවේදනවලට විතරක් සීමාවී තිබෙන වෙලාවක බිම්මට්ටමට ගිහිල්ලා ජනතාවටත් රාජ්‍ය ආයතනවලටත් ලබාදිය හැකි කුඩා හෝ සහනයක් ලබාදීමට අපි මැදිහත්වෙමින් තිබෙනවා. ඒ සංස්කෘතිය වමේ සංස්කෘතියයි. ඒක ජනතා විමුක්ති පෙරමුණ ආරම්භයේ සිටම තියෙන සංස්කෘතියක්. ජනතාව වෙනුවෙන් කැප කිරීම් කළ යුතුයි කියන ආදර්ශය අපිට දුන්නේ 71 පරපුරේ පුරෝගාමීන්. 

ප්‍රතිලාභ බලාපොරොත්තුවෙන් තොරව සමස්ත මානව සමාජය වෙනුවෙන් කැපකිරීම් කරන්න ඕනෑ කියන ආදර්ශය අදටත් ජනතා විමුක්ති පෙරමුණ ක්‍රියාවට නගමින් ඉන්නවා. ඒක සරල කාරණයක් නොවෙයි. දුෂ්කරතා තියෙනවා. සීමාකම් තියෙනවා. නමුත් ඒ හැම දේටම වඩා අවලාද අපහාස සහ බාධාකිරීම් මැද්දේ අපි උපරිමයෙන් කැපවී ඉන්නවා. එහෙම සංස්කෘතියක්, පුරුද්දක් නැති කොරෝනා පැරදවීමට කිසිම දෙයක් නොකරන පිරිසකට මේක දරා ගන්න බැහැ. ඒ නිසා සහන කටයුතු කරමින් ඉන්න ජනතා විමුක්ති පෙරමුණට සහ අපේ සහන කණ්ඩායම්වලට අවලාද නගමින් ඉන්නවා.

වමේ ව්‍යාපාරයකට මේක අලුත් දෙයක් නෙවෙයි. 71දීත් මේ වැඬේ කළා. සතුරන්ගේ අවලාද සියල්ල මැද ජනතාව වෙනුවෙන් සේවය කරන්න ධෛර්යය අපිට තිබෙනවා. ජනතාව වෙනුවෙන් මේ මොහොතේදී කරන කාර්යයන් දශයකින්වත් අඩු කොකරන බව අපි අපේ සතුරන්ට අවධාරණයෙන් කියනවා. ජනතා විමුක්ති පෙරමුණ හැටියට මේ සමාජය වෙනුවෙන් කිරීමට තිබෙන වගකීම් සහ යුතුකම් කොටස ඕනෑම තත්වයක් යටතේ ඉටුකරන බවට අපි සහතික වෙනවා. අපි අද විශේෂ තත්වයක් තුළ පවා සමරන 71 සහෝදර සහෝදරියන්ගේ ආදර්ශය අපට වැදගත් වෙන්නේ මේ නිසයි. 

අපි කාගේත් ප්‍රාර්ථනාව, මූලිකම අරමුණ විය යුත්තේ මේ වසංගතයෙන් රට මුදාගැනීමයි. රෝගය පරාජයට පත්කිරීමයි. ඒ වෙනුවෙන් ජනතාව වෙනුවෙන් අපි කරන සහන කටයුතු වගේම මේක අත්දැකීමක් කරගෙන අලුත් සමාජයක් නිර්මාණය කළ යුතුව තිබෙනවා. පාලක පංතිය සහ ජනතා විමුක්ති පෙරමුණේ ක්‍රියාමාර්ග සසඳා බලා තේරුම් ගත යුතුව තිබෙනවා. කොරෝනා පරද්දන ධෛර්යයෙන්ම ධනවාදය පැරදවීමේ අරගලයත් 1971 අපේ්්‍රල් විරුවන්ගෙන් ලබාගැනීමයි ඔවුන් වෙනුවෙන් කළ හැකි ඉහළම සැමරුමයි.

තම තමන් ආරක්‍ෂා වෙමින් අසල් වැසියන් වෙනුවෙන් මැදිහත්වීමත් මනුෂ්‍යත්වය වෙනුවෙන් කැපවීමත් කරන ලෙස අපි ඉල්ලනවා. මනුෂ්‍යත්වය නැති ධනවාදය වෙනුවට මනුෂ්‍යත්වයෙන් පිරි සමාජයකුත්, ජාතිභේද, ආගම්භේද නැති සමාජයකුත් 71 විරුවන් බලාපොරොත්තු වුණා. රෝගී තත්වය මැද්දෙත් ජාතිවාදය වපුරන, ආගම්වාදය වපුරන කුණුවෙච්ච සමාජ ක්‍රමය වෙනුවට කවුරුත් මිනිසුන්ට මිනිසුන් වශයෙන් සලකන විනයගරුක සමාජයක් අපි ගොඩනැගිය යුතුව තිබෙනවා. මේවා කරන්න ධනවාදයටත් ධනවාදී නායකයන්ටත් බැහැ. මීට අවශ්‍ය විනය, කැපවීම සමාජවාදී රටවල් තුළ තිබෙනවා. ඒ නිසා අපි සාධාරණ යුක්තිගරුක මනුෂ්‍යත්වය පිරිච්ච මිනිසුන් බිහි කරන සමාජවාදී සමාජයක් වෙනුවෙන් අපි අරගල කළ යුතුව තිබෙනවා. 

මේ වසංගතයෙන් රට මුදවා ගත්පසු ආර්ථික අර්බුදයක් ඇතිවීමේ අනතුර තිබෙනවා. නිෂ්පාදන කඩාවැටීම, රැකියා අහිමිවීම වගේ සමාජ අර්බුද මතුවීමේ අනතුරක් තිබෙනවා. මේ හැමදේකටම උත්තර තිබෙන්නේ සමාජවාදී සමාජයක් තුළ. ඒ සමාජවාදී සමාජයක් ගොඩනගා ගැනීම සඳහා උපරිම ආකාරයෙන් කැප වෙමු කියන ඉල්ලීම අපි කරනවා. මනුෂ්‍යත්වය ගොඩනැගීම වෙනුවෙන් අසීමිත කැප කරීමක් කළ 71 අරගලයේදී දිවිපිදූ අපේ ආදරණීය සහෝදරයෙකු ලියූ කවියකින් අපි ඔබෙන් සමු ගන්නවා. 

පරවී ගියත් පිබිදුනු රතු මල් සියලූ
නැවතත් පිපෙනු ඇත දස දහසින් කැකුළු
නිදහස පතා ඔබ හෙළු දහදිය කඳුළු
හරි බව කියනු ඇත මතු හදවත් සියලූ

Ad Widget

Recommended For You

About the Author: Editor

Leave a Reply

Your email address will not be published. Required fields are marked *