ඊයේ වාර්තා වූ කොවිඩ් ආසාදිතයින් 33න් 31ක්ම නාවික හමුදා සෙබළුන් – යුද්ධ හමුදාපති

නාවික හමුදාව තුළ අද (05) දිනය වන විට කොවිඩ් 19 වෛරසය ආසාදිතයින් සංඛ්‍යාව 329ක් වන බවත් අද දින පුද්ගලයින් 138 දෙනෙකු නිරෝධායන කටයුතු සඳහා පූනානී නිරෝධායන මධ්‍යස්ථානය වෙත රැගෙන යන ලද බවත් කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ දී අද (5) දින පැවැත්වූ මාධ්‍ය හමුවේදී ආරක්‍ෂක මාණ්ඩලික ප්‍රධානී, යුද්ධ හමුදාධිපති සහ කොවිඩ්-19 පැතිරීම වැළැක්විමේ ජාතික ක්‍රියාන්විත මධ්‍යස්ථානයේ ප්‍රධානී ලුතිනන් ජෙනරාල් ශවේන්ද්‍ර සිල්වා මහතා පැවසීය.

එහෙත් වැඩි දුරටත් අදහස් දක්වමින් යුද්ධ හමුදාපතිවරයා මෙසේද සදහන් කළේය.

එක්සත් රාජධානියේ ලන්ඩන් නුවර (London) සිට ශ්‍රී ලංකන් මගී ගුවන් යානයක් මගින් සිසුන් සහ රාජ්‍ය සේවකයන් ඇතුළුව පුද්ගලයින් 210 කට ආසන්න කණ්ඩායමක් හෙට (06) දින උදෑසන දිවයිනට පැමිණීමට නියමිතව ඇත.

එසේ පැමිණෙන ඔවුන් සියළු දෙනා ත්‍රිවිධ හමුදාව විසින් පාලනය කරනු ලබන නිරෝධායන මධ්‍යස්ථාන වෙත නිරෝධායන ක්‍රියාවලිය සඳහා යොමුකිරීමට මේවන විට සියළු කටයුතු සූදානම් කර ඇත.

යුද්ධ හමුදාව විසින් පවත්වාගෙන යනු ලබන පූනානි නිරෝධායන මධ්‍යස්ථානයෙන් සහ ගුවන් හමුදාව විසින් පවත්වාගෙන යනු ලබන වැලිසර නිරෝධායන මධ්‍යස්ථානය වෙතින් පුද්ගලයින් 47 දෙනෙකු නිරෝධායන ක්‍රියාවලියෙන් අනතුරුව, PCR පරික්‍ෂණය සිදුකර අද (05) දින තම නිවෙස් වෙත පිටත් කරන ලදී.

අද (5) දිනය වන විට ත්‍රිවිධ හමුදාව විසින් පවත්වාගෙන යනු ලබන නිරෝධායන මධ්‍යස්ථාන තුළින් පුද්ගලයින් 5089 දෙනෙකු නිරෝධායන ක්‍රියාවලිය අවසන්වී තම නිවෙස් වෙත පිටව ගොස් ඇත.

ඊයේ (04) දිනයේ නුවර කොළොම්බිස්ස ප්‍රදේශයෙන් පුද්ගලයෙකු ආසාදනය වීමත් සමගම ඔවුන් සමීපව ඇසුරු කළ පවුල් 18 ක පුද්ගලයින් 67 දෙනකු සහ අද (05) දිනයේ  රාජගිරිය බණඩාරනායකපුර ප්‍රදේශයෙන් කොවිඩ්-19 ආසාදිත පුද්ගලයෙකු හමුවීමත් සමග ඔහු සමීපව ඇසුරු කරන ලද පුද්ගලයින් 29 දෙනෙකුත් කොළොන්නාව ප්‍රදේශයේ කොවිඩ්-19 වෛරසය ආසාදිත පුද්ගලයෙකු සොයාගැනිමත් සමගම එම ආසාදිත පුද්ගලයා සමීපව ඇසුරු කරනු ලැබු පුද්ගලයින් 27 දෙනෙකු ද එසේම, මෝදර මහල් නිවාස සංකීර්ණයෙන් වෛරසය ආසාදිත පුද්ගලයෙකු සොයාගැනිමත් සමගම එම ආසාදිත පුද්ගලයා සමීපව ඇසුරු කළ පුද්ගලයින් 15 දෙනෙකු ඇතුළුව පුද්ගලයින් 138 දෙනෙකු නිරෝධායන කටයුතු සඳහා පූනානී නිරෝධායන මධ්‍යස්ථානය වෙත රැගෙන යන ලදී.

ඒ අනුව ත්‍රිවිධ හමුදාව මගින් පාලනය කරනු ලබන නිරෝධායන මධ්‍යස්ථාන 39 ක් තුළ පුද්ගලයින් 4816 දෙනෙකු මේ වන විට නිරෝධායනය වෙමින් සිටියි.

ඊයේ (04) දිනයේ ශ්‍රි ලංකාව තුළ සොයාගත් ආසාදිතයන් 33 දෙනොගෙන් 31 දෙනෙකු ශ්‍රි ලංකා නාවික හමුදාවේ වැලිසර කදවුරේ වීරෝධාර රණවිරුවන් වේ. ඒ අනුව නාවික හමුදාව තුළ අද (05) දිනය වන විට කොවිඩ් 19 වෛරසය ආසාදිත වීරෝධාර රණවිරුවන් සංඛ්‍යාව 329 ක් වේ.

අද (05) දිනයේ ත්‍රිවිධ හමුදාව පසුගිය මස සිදු කල අයුරින්ම ත්‍රිවිධ හමුදාවේ  සම්බන්ධීකරනයෙන් ශ්‍රි ලංකාවේ ජ්‍යෙෂ්ඨ පුරවැසියන් 6,45000 කට පමණ පිරිසකට විශ්‍රාම වැටුප් ලබාගැනීම සඳහා තම නිවසේ සිට බැංකු වෙතට යාමට සහ නැවත තම නිවෙස් වෙත පැමිණීමට ප්‍රවාහන පහසුකම් ලබාදෙන ලදී. 

ශ්‍රි ලංකා යුද්ධ හමුදාවේ වීරෝධාර රණවිරුවෙකු කදවුරකින් තවත් කදවුරකට ගමන් කරමින් සිටියදී දඹුල්ල ප්‍රදේශයේදී ඊයේ (04) දිනයේ මිය යන ලදී. ඔහුට විටින් විට අපස්මාරය නැමති රෝගය වැළදී ඇත. මේවන විට පස්චාත් මරණ පරික්‍ෂණය සිදු වන අතර, එම පරීක්‍ෂණයෙන් පසුව ඉදිරි තොරතුරු ලබාදීමට කටයුතු කරනු ලබයි.

Ad Widget

Recommended For You

About the Author: Editor

Leave a Reply

Your email address will not be published.