Hot Plate: අපායේ ඉන්ටවල් ඉවරයි ! හාල්මැස්සගේ සිට පරිප්පු ටික දක්වා බදු ගසයි

රජය විසින් අත්‍යවශ්‍ය ආනයනික භාණ්ඩ සදහා කිලෝ ග්‍රැමයකට රුපියල් 05.00 සිට 800.00 දක්වා වන පුළුල් පරාසයක විදිදෙන සේ නව බදු පැනවීමක් සිදුකර තිබෙනවා. පසුගිය 21 වැනි දින මුදල් අමාත්‍ය මහින්ද රාජපක්ෂ මහතාගේ අත්සනින් යුත් මෙම නව බදු පැනවීම් පිළිබද නියෝගය නිකුත් කර ඇති අතර එහි සදහන් වන්නේ මැයි මස 22 වැනිදා සිට මාස 06ක කාලයක් සදහා මෙම නව බදු පැනවීම් වලංගු වන බවයි. ඒ අනුව ඊයේ (22) රාත්‍රියේ සිට නව බදු ක්‍රියාත්මක වන බව සදහන්.

මේ නව බදු පැනවීම ගැන අප කළ විමසීමකට පිළිතුරු දෙමින් ආර්ථික හා දේශපාලන විශ්ලේෂක ආචාර්ය ඉන්ද්‍රජිත් හේවාවිතාරණ මහතා සදහන් කළේ මේ බදු පැනවීම මගින් ඉතාම පැහැදිලි ලෙස සීනි, අර්තාපල්, රතුළුෑණු, පරිප්පු, ෆාම් තෙල් ඇතුළු අත්‍යවශ්‍ය භාණ්ඩ රැසක දැවැන්ත මිල ඉහළ යාමක් සිදුවනු ඇති බවයි. විශේෂයෙන් ජනපතිවරයා ජාතිය අමතා අඩු කළ රතු පරිප්පු සහ සැමන් සදහා ද යළි බදු පැනවීම හාස්‍ය ජනක බවයි ඔහු සදහන් කළේ.

‘මේ හරහා ඇත්තටම ලෝක වෙළදපොළේ බොරතෙල් මිල දැවැන්ත ලෙස පහළ යාමේ වාසිය ජනතාවගෙන් සොරා ගෙන තිබෙනවා. අනෙක් අතට මේ භාණ්ඩ බදු පනවා ඇති බොහෝ භාණ්ඩ ප්‍රමාණවත් තරම් ලංකාව තුළ නිෂ්පාදනය වෙන්නේ නැහැ. උදාහරණයක් ලෙස යෝගට් ගන්න. යෝගට් කිලෝ ග්‍රෑමයකට රුපියල් 800ක විශේෂ බද්දක් පනවා තිබෙනවා. ඒ කාණ්ඩය යටතේම ‘අනෙකුත්‘ කියලා සදහන් වන භාණ්ඩ සදහා ද රුපියල් 800ක බදු පැනවීමක් සිදු වෙනවා. යෝගට් කියන්නේ දරුවන්ගේ පෝෂණය සදහා අත්‍යවශ්‍ය ආහාරයක්. වෛද්‍යවරුන් දිගින් දිගටම මේ ගැන අවධාරණය කරනවා. අද සිට ළමයෙක්ට යෝගට් එකක් කන්න තියෙන අවස්ථාව අහිමි වෙනවා. මොකද ලංකාව තුළ දේශීය වශයෙන් යෝගට් නිෂ්පාදනය සිදුවන්නේ නැහැ. එවිට දේශීය නිෂ්පාදනවල මිල ඉහළ යාම අනිවාර්ය කාරණයක්‘

මෙහිදී අල, රතුළුෑණු සහ සුදුලලුණු සදහා කිලෝවකට රුපියල් 50.00ක බදු ගැසීම ගැන සදහන් කරමින් ආචාර්ය ඉන්ද්‍රජිත් හේවාවිතාරණ කියා සිටියේ ලංකාව තුළ පාරිභෝජනයට අවශ්‍ය තරම් අල සහ රතුළුෑණු නිෂ්පාදනයක් සිදු නොවන නිසා අනිවාර්යයෙන් බදුවලට වඩා වැඩි මිල ඉහළ යාමක් සිදුවිය හැකි බවයි.

‘ආණ්ඩුවට උපදෙස් දෙන ඊනියා උපදේශකයෝ පසුගිය දා මෙරට නිෂ්පාදනය කළ හැකි කෘෂිකාර්මික භාණ්ඩ 16ක් ආනයනය තහනම් කිරීම ගැන කතා කළා. එහි ප්‍රතිඵලයක් තමයි මේ. ඒත් මේ රටේ මිලියන 20කට කන්න දෙන්න පුළුවන් තරමට දේශීය වශයෙන් අල සහ රතුළුෑණු නිෂ්පාදනයක් සිදුවන්නෙම නැහැ. ඇත්ත සංඛ්‍යා ලේඛන ගෙන බැලුවොත් පහසුවෙන් තත්ත්වය අවබෝධකර ගත හැකියි. අනෙක් අතට අල කියන්නේ මේ රටේ සාමාන්‍ය ජනතාවගේ ආහාර වේල තුළ තිබෙන සුලභ භාණ්ඩයක්. අල ටිකක්, පරිප්පු ටිකක්, සෝයා ටිකක් වගේ දේවල් තමයි මේ සාමාන්‍ය ජනතාව බහුලව පාරිභෝජනය කරන්නේ. දැන් ඉතිං කොවිඩ් වසංගතය නිසා ආර්ථික ශක්තිය දුර්වල වෙලා සිටින ජනතාවට තවත් වටයකින් ජීවන වියදම ඉහළ යාමකට මුහුණදීමට සිදු වෙනවා‘

මෙහිදී ආනයනික පලතුරු සදහා වන දැවැන්ත බදු ඉහළ යාම පිළිබදව අදහස් පළ කළ ආචාර්ය ඉන්ද්‍රජිත් හේවාවිතාරණ මහතා කියා සිටියේ මෙය ද විකෘති තත්ත්වයක් බවයි.

‘ඇපල් සදහා කිලෝවකට රුපියල් 100ක්, දොඩම් සදහා කිලෝවකට රුපියල් 125ක්, ලෙමන් සදහා කිලෝවකට රුපියල් 350ක්, මිදි සදහා රුපියල් 200ක් ආදි වශයෙන් බදු පැනවීමක් සිදු වෙනවා. කාට හරි තර්ක කරන්න පුළුවන් දේශීය වශයෙන් නිෂ්පාදනය වන පලතුරු ප්‍රවර්ධනයට මේ බදු උපකාර වෙනවා කියලා. ඒත් අඹ, කෙසෙල්, ගස්ලබු වල දේශීය මිල ගණන් පවා ජනතාවට දරා ගන්න අමාරුයි. මේ්වායින් අතරමැදියා තමයි විශාල ලාභයක් ගන්නේ දේශීය වශයෙන් වගා කරන පේර කිලෝවක් පවා රුපියල් 250ක් විතර වෙනවා. වාරයට පමණක් මිලදී ගත හැකි උගුරැස්ස වාගේ පලතුරු ග්‍රෑම් 100ක් පවා රුපියල් 200ක් විතර වෙනවා. අනෙක් අතට ඇපල්, මිදි, දොඩම් කියන්නේ විශේෂයෙන් කුඩා ළමුන්ට සහ රෝගීන්ට දෙන ආහාර මේ සිදුවන්නේ යෝගට් අහිමි කළා වාගේ දරුවන්ට මේ පලතුරු අහිමි කිරීම‘

රට ඉදිවලට රුපියල් 100ක බදු පැනවීමක් ගැන අදහස් දක්වමින් ආචාර්ය ඉන්ද්‍රජිත් හේවාවිතාරණ සදහන් කළේ රාමසාන් උපවාස සමයේ ඉස්ලාම් භක්තිකයින්ට අත්‍යවශ්‍ය ආහාර වර්ගයක් වන රටඉදි මත සිදුකළ නව බදු පැනවීම කනගාටුදායක බවයි.

‘සමස්තයක් විදහට මිරිස් කුඩු ටිකේ සිට පරිප්පු ටික දක්වා මේ හරහා අති දැවැන්ත මිල ඉහළ යාමක් සිදුවෙනවා. මොකද අපි ගණනය නොකළට මිරිස්, තෙල් වර්ග, කරවල, විශේෂයෙන් හාල්මැස්සන්, (කුඩා ළමුන්ට අත්‍යවශ්‍ය පෝෂණය සහිත) එක්ක සමස්ත පැකේජය ගත් විට නිවස සාමාන්‍ය මාසික වියදමින් සැලකිය යුතු ප්‍රතිශයක් මේ භාණ්ඩ හරහා නියෝජනය කරනවා. ඒ නිසා මම පැහැදිලිව සදහන් කරන්නේ මේ හරහා සාමාන්‍ය ජනතාවට දැවැන්ත ජීවන වියදම ඉහළ යාමකට මුහුණ දීමට සිදු වෙනවා. විශේෂයෙන් අති බහුතරයක් ජනතාවට තමන්ගේ ජීවන මාර්ග, අතිරේක ආදායම් අහිමි වීම තුළ සිදුවන්නේ ගහෙන් වැටුණ මිනිහට ගොනා ඇන්නා වාගේ තත්ත්වයක්.

නව ආනයනික බදු පනවා ඇති සම්පුර්ණ භාණ්ඩ පිලිබඳ සවිස්තරාත්මක ලැයිස්තුව පහතින් දැක්වේ.

atyawasya 740px
1
2
3
4

සටහන – තීක්ෂණ වෙලෙන්එගොඩ

Ad Widget

Recommended For You

About the Author: Editor

Leave a Reply

Your email address will not be published.