පොදු ප්‍රවාහන සේවා සාමාන්‍ය පරිදි ක්‍රියාත්මක කිරීම පිළිබඳ අවසන් තීරණය හෙට

මේ අතර දුම්රිය හා බස් රථ මගීන්ද දැඩිව අවධාරණය කරන්නේ ආණ්ඩුව පොදු ජනතාවගේ ප්‍රවාහන සේවා ගැන මළ පොතේ අකුරක් නොදන්නා සේ කටයුතු කිරීම හාස්‍යජනක බවයි.

හෙට (8) සිට සමාන්‍ය කාර්යාල හා පොදු කටයුතු ආරම්භ කරන බවට රජය විසින් නිවේදනය කර තිබුණත් පොදු ප්‍රවාහන සේවා සාමාන්‍ය පරිදි පවත්වාගෙන යාම සම්බන්ධයෙන් අවසාන තීරණය ගනු ලබන්නේ ජනාධිපති ගෝඨාභය රාජපක්‍ෂ මහතා සමඟ හෙට (8) පැවැත්වෙන සාකච්ඡාවෙන් පසුව බව මගී ප්‍රවාහන කළමනාකරණ සහ විදුලිබල හා බලශක්ති අමාත්‍ය මහින්ද අමරවීර මහතා අද (7) පැවැති ප්‍රවෘත්ති සාකච්ඡාවකදී පැවසුවා.

එහිදී අමාත්‍යවරයා සදහන් කළේ විශේෂයෙන් අන්තර් පළාත් බස් සේවාවන් අද දිනයේත් ක්‍රියාත්මක වන්නේ කොළඹ සහ ගම්පහ දිස්ත්‍රික්ක හැර සෙසු දිස්ත්‍රික්ක අතර පමණක් බවයි.

මේ සම්බන්ධයෙන් වැඩි දුරටත් කරුණු පැහැදිලි කළ අමාත්‍යවරයා,

‘ පොදු ප්‍රවාහන සේවාවන් හෙට (8) සිට සාමාන්‍ය පරිදි පවත්වාගෙන යාමට රජය තීරණය කර තිබුණත් ජනාධිපති මාධ්‍ය අංශය ඉකුත් 5 වැනිදා නිකුත් කරන ලද නිවේදනයෙහි තොළඹ, ගම්පහ දිස්ත්‍රික්ක හැර සෙසු දිස්ත්‍රික්කවල පමණක් පොදු ප්‍රවාහන සේවා ක්‍රියාත්මක කළ යුතු බව සඳහන් කර තිබීම හේතුවෙන් කිසියම් ගැටලුවක් උද්ගත වී තිබෙනවා. මේ තත්ත්වය තුළ පොදු ප්‍රවාහන සේවාවන් ක්‍රියාත්මක කිරීම සම්බන්ධයෙන් වන සාකච්ඡාවක් ජනාධිපති ගෝඨාභය රාජපක්‍ෂ මහතා සහ ප්‍රවාහන සේවාවන්ට අදාළ පාර්ශව අතර හෙට (8) දිනයේදී පැවැත්වීමට නියමිතයි. එහිදී ජනාධිපතිවරයා ලබාදෙන උපදෙස් අනුව ඉදිරි පොදු ප්‍රවාහන සේවා ක්‍රියාත්මක කිරීමට අමාත්‍යාංශය පියවර ගන්නවා‘

මෙහිදී ප්‍රධාන නගර වෙත, විශේෂයෙන් කොළඹ නගරයට නිරෝධායන නීති අනුව සියලු රාජ්‍ය හා පුද්ගලික අංශයේ සේවකයින් ප්‍රවාහනය කිරීමට ප්‍රවාහන සේවා ප්‍රමාණවත් දැයි විමසූ විට අමාත්‍යවරයා කියා සිටියේ,

‘සෞඛ්‍ය අංශ ලබාදී ඇති උපදෙස් අනුව ආසන සංඛ්‍යාව අනුව පමණක් මගීන් ප්‍රවාහනය කිරීමේදී දැනට පවතින ලංගම හා පෞද්ගලික බස් රථ ප්‍රමාණවත් නැහැ. ඊට විකල්පයක් ලෙස සංචාරක සේවා බස්රථ මෙන්ම දැනට ලියාපදිංචිය සඳහා පොරොත්තු ලේඛනයේ ඇති බස් රථ ද මගී ප්‍රවාහනය සඳහා තාවකාලිකව ලියාපදිංචි කිරීමට පියවර ගෙන තිබෙනවා. තාවකාලිකව ලියාපදිංචි කරන එම බස් රථ අවශ්‍යතාව අනුව පමණක් ධාවනයට යොදවන ලෙස මම ගමනාගමන කොමිසමට උපදෙස් දී තිබෙනවා‘

හෙට සිට ක්‍රියාත්මක වන දුම්රිය සේවා ගැන අදහස් දක්වමින් අද (7) දුම්රිය වෘත්තීය සමිති නායකයින් අවධාරණය කළේ නිරෝධායන නීති අනුව දුම්රියේ ගමන් කිරීමට ජනතාවට කිසිසේත්ම ප්‍රමාණවත් පහසුකම් නැති බවයි.

‘ඉතාම පැහැදිලිව අපි කියනවා දුම්රිය දෙපාර්තමේන්තුව සතු දුම්රියවල මගීන්ට ඉදගෙන ගමන් කිරීමට සිදු වන තත්ත්වයක් තුළ ප්‍රමාණවත් ආසන පහසුකම් නැහැ. ඒ නිසා හෙට සිට දුම්රිය ප්‍රවාහනය තුළ අර්බුදයක් නිර්මාණය වීම අනිවාර්යයි‘

මේ අතර දුම්රිය හා බස් රථ මගීන්ද දැඩිව අවධාරණය කරන්නේ ආණ්ඩුව පොදු ජනතාවගේ ප්‍රවාහන සේවා ගැන මළ පොතේ අකුරක් නොදන්නා සේ කටයුතු කිරීම හාස්‍යජනක බවයි.

‘මේ ඇමැතිවරු කියන්නේ මොන විහිළු කතාද කියලා අපිට හිතෙනවා. එක කොච්චියක ගත්තොත් ඉදගෙන යන ගාණට වඩා පස් හය ගුණයක් හිටගෙන, එල්ලිලා යනවා. ෆුඩ්බෝඩ් එකේ යනවා. අපිට ඇගිල්ලක් ගහන්නවත් ඉඩක් කාර්යාල දුම්රිය තුළ නැහැ. ඒ වගේ තත්ත්වයක් තියෙද්දී මේ ඉදගෙන යන්න කියන කතා කියන්නේ මොන හිතකින්ද කියලා අපිට හිතෙනවා. අපි කියන්නේ මේ දේශපාලනඥයින් සහ ඉහළ නිලධාරීන් කිසිම දාක කාර්යාල දුම්රියක් දැකලා නැතිව ඇති. එහෙම දැකලා තියෙනවා නම් මේ වගේ බයිලා කියන්නෑ‘ අප සමග අදහස් දැක්වූ කොළඹ රාජ්‍ය ආයතනය කළමනාකාර සහකාරවරයෙක් පැවසුවා.

ඔහු සදහන් කළේ තමන් දෛනිකව දුම්රියට ගොඩවන පානදුර දුම්රිය පොළෙන් පිටත්වන කිසිම කාර්යාල දුම්රියක ඇගිල්ලක් ගැසීමටවත් ඉඩක් නොමැති බවයි.

‘මේවා ජනතාවට විහිළු සපයන කතා. පොදු ප්‍රවාහන සේවාවල ඇත්ත තත්ත්වය දන්න කිසිවෙක් මේ බයිලා විශ්වාස කරන්නෑ‘ ඔහු වැඩි දුරටත් පැවසුවා.

කොළඹට යාමට බස් රථ භාවිත කරන මගීන්ගේද ප්‍රධාන මැසිවිල්ල වන්නේ එල්ලී යාමටවත් බස්රථ ප්‍රමාණවත් නොවන රටක සීට් ගානට මගීන් ගෙන යාම ගැන කතා කිරීම විහිළුවක් බවයි.

‘මේ පාලකයෝ සහ නිලධාරීන් හදෙන් පාත් වුණ ගානට තමයි සැලසුම් සකස් කරන්නේ. අපිට බස් එකක ඇගිල්ලක් ගහන්න ඉඩක් නැහැ. එහෙම නම් අපි හෙට ඉදනි කොහොමද නිරෝධාන නීති අනුව ගමන් කරන්නේ ‘

කැස්බෑව නගරයේ සිට කොළඹ කොටුවට දෛනිකව රාජකාරී සදහා ගමන් කරන දිස්නා කුමාරි මහත්මිය ප්‍රශ්න කළාය.

Ad Widget

Recommended For You

About the Author: Editor

Leave a Reply

Your email address will not be published.