Political vs Political: ප්‍රසන්නගෙන් ජෝන්ස්ටන්ට දැවැන්ත අභියෝගයක්

සටහන – ගජබා නාගහවත්ත

ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂගේ පසුගිය සෙනසුරාදා ඇමති ප්‍රසන්න රණතුංගට හදිසි දුරකථන ඇමතුමක් ලැබුණේය.

” ප්‍රසන්න හෙට මොකද කරන්නනේ ?  ” බැසිල් ඇසුවේය.

” ඇයි සර්, මොකක්ද කරන්න ඕනේ ” ප්‍රසන්න පෙරළා ඇසුවේය.

” ප්‍රසන්නට ලොකු වැඩක් නැත්නම් හෙට කුරුණෑගලට ගිහින් එනවද? අපේ පළාත් පාලන මන්ත්‍රීවරුන් දැනුවත් කිරීමේ රැස්වීම් වගයක් තියෙනවා. ඒ අය කැමතියි ප්‍රසන්න එනවට “. බැසිල් පැහැදිලි කළේය.

” මමත් කැමැත්තෙන් හිටියේ කුරුණෑගල රැස්වීමකට දෙකකට යන්න. මම අනිවාර්යෙන්ම යන්නම් සර්. මට මහින්ද මහත්තයා වෙනුවෙන් කුරුණෑගල දිස්ත්‍රික්කයේ මිනිස්සුන්ට කතා කරන්න කැමැත්තෙන් හිටියේ. ” ප්‍රසන්න කීවේය.

ප්‍රසන්නගෙන් ජෝන්ස්ටන්ට දැවැන්ත අභියෝගයක්

පසුගිය ඉරිදා සවස ඇමති ප්‍රසන්න කුලියාපිටියට ගියේ ඒ අනුවයි. රැස්වීමට ජොන්ස්ටන් ප්‍රනාන්දු ඇමතිතුමා ද පැමිණ සිටියේය. ප්‍රසන්න සිය කතාවේදී මෙවර මහ මැතිවරණයේදී මහින්ද අතහැර නොයන අයට ඡන්දය දෙන්නැ‘යි කීවේය. මෛත්‍රීට ඡන්දය නොදෙන ලෙස ඉල්ලන්න තමන් පොළොන්නරුවට යාමට සූදානම් බවද ඔහු කීවේය. ප්‍රසන්නගේ කතාවට ලැබුණේ ඉහළ ප්‍රතිචාරයකි.

කථාව අවසන් කළ ප්‍රසන්න නැවත සිය අසුනට පැමිණි විට ජොන්ස්ටන් ප්‍රසන්නගෙන් ඇසුවේ ” ඇත්තටම ඔයා පොළොන්නරු යනවද ? ”  කියාය.

” නැතුව මම අනිවාර්යෙන් යනවා. ගිහින් කියනවා මෛත්‍රීට ඡන්දය දෙන්න එපා කියලා. මෛත්‍රී මොකාට ද එන්නේ කියලා මම නම් හොඳ අවධානයෙන් ඉන්නේ. ආපහු උකුසු සෙල්ලම් දාන්න එයාට ඉඩදෙන්න බෑනේ. ” ප්‍රසන්න කීවේ සියලුදෙනා සිනා ගන්වමිනි.

” හැබැයි ඇමතිතුමා ගම්පහ මිනිස්සු ඔබතුමා එක්ක නම් තරහයි. ” ප්‍රසන්න ජොනීට කීවේය.

”  ඒ මොකද ? ” ප්‍රසන්න ඇසුවේය.

” නෑ ඉතිං මේ පාර අගමැති බිහිකරන්න ගම්පහට තිබුණු චාන්ස් එක ඔබතුමා උදුරගත්ත නේ” ප්‍රසන්න කීවේ මහින්ද මෙවර මහමැතිවරණයේදී ගම්පහින් තරඟ කළ යුතු  බවට තිබුණු ඉල්ලීම මතක් කරමිනි .

” අපිට අගමැති කෙනෙක් පත් කරගන්න තියෙන චාන්ස් එක මොකට ද වෙන දිස්ත්‍රික්කයට දෙන්න. ” ජොනී සිනාසෙමින් කීවේය .

” මහින්ද මහත්තයා කැමති වු‍ණෙත් නෑ කුරුණෑගල දාලා එන්න. මම ගම්පහින් තරඟ කරමු සර් කියලා කිව්වාම මහින්ද මහත්තයා කිව්වා මම පැරදුනු වෙලාවේ අවස්ථාව දුන්න කුරුණෑගල මිනිස්සු දාලා ගම්පහට එන්න බැහැ කියලා ” ප්‍රසන්න කිවේය.

” ඕකනේ ඇමතිතුමා රටේ මිනිස්සු මහින්ද මහත්තයාට ආදරේ. ඒ අය කවදාවත් මිනිස්සු අමතක කරන්නේ නෑ. ” ජොන්ස්ටන් කීවේය.

“ හැබැයි ඇමතිතුමා අපි තමයි මේ පාරත් තීරණාත්මක වැඩි ඡන්ද ටික ගන්නේ. ගියපාර අපි තුන්ලක්ෂ හැටපන්දහසක් ගත්තා. ඒක නොතිබුනානම් ගෝඨාභය සර් 51% ඡන්ද ගන්නෙත් නෑ. මේ පාරත් වැඩිම ඡන්ද ගන්නේ ගම්පහින්. පුළුවන් නම් කුරුණෑගලින් අරන් පෙන්වන්න. ප්‍රසන්න ජොනීට අභියෝග කරමින් කීවේය.

” මම දන්නවා ඔයා කිව්වොත් කිව්වා කියලා. අපි බලමුකෝ. ” ජොනී සිනාසෙමින් කීවේය.

ප්‍රසන්නගේ ඉල්ලීමට ජනපතිගෙන් යහපත් ප්‍රතිචාර

කැබිනට් මණ්ඩලය පසුගිය බදාදා රැස්වූයේ ජනපති ගෝඨාභයගේ ප්‍රධානත්වයෙනි. කැබිනට් රැස්වීම අතරතුර ඇමති ප්‍රසන්න රණතුංග ජනාධිපතිවරයාගෙන් විශේෂ ඉල්ලීමක් කළේය.

“ සර්, යක්කල වික්‍රමාරච්චි ආයුර්වේදය කැළණියේ ෆැකල්ටියක්. ඒක විශ්ව විද්‍යාල තත්ත්වයට උසස් කරන්න කියලා ඉල්ලීමක් තියෙනවා. ඕක පසුගිය යහපාලනය කල් මර මර හිටියේ. ඒක කරන්න පුළුවන් නම් ලොකු දෙයක්”. ප්‍රසන්න කීවේය.

“අපි ඒ ගැන සාකච්ඡා කරමින් යනවා”. බන්දුල කීවේය.

“අපේ තාත්තා තමයි වික්‍රමාරච්චි එක පීඨයක් කරන්න ළමයි කරපු ෆයිට් එකට සපෝට් කළේ. මමත් එතන හිටියා. මේක යු.එන්.පි ආණ්ඩුව හැමදාම කල් දැම්මා”. ප්‍රසන්න කීවේය.

මට මතකයි. මමත් ඕකට සපෝට් කළා”. මහින්ද කීවේය.

“අපි මේ වැඩේ එහෙනම් ඉක්මණින් කරමු. උසස් අධ්‍යාපන ඇමතිතුමා ඉක්මණින් ඒක කරන්න”. ජනපති ගෝඨාභය බන්දුලට කීවේය.

ජනපතිගේ මහ බැංකු කතාවට ප්‍රසන්නගෙන් තල්ලුවක්

කැබිනට් මණ්ඩලයේ අනතුරුව සතුටු සාමිච්චියේ යෙදී සිටි ඇමතිවරුන්ගේ ප්‍රධාන මාතෘකාවක් වුණේ ජනාධිපතිවරයා ඊට පෙර මහ බැංකුවට කළ අනතුරු ඇගවීම ගැනය.

“ජනාධිපතිතුමා ඒ කරපු කථාව හොදයි. ලීසිං කොම්පැණි, බැංකු පහුගිය කාලයේ ආණ්ඩුව දීපු සහන දුන්නේ නෑ. පුළුවන් තරම් මිනිස්සු රස්තියාදු කළා”. ප්‍රසන්න කීවේය.

“ඒක ඇත්ත. මටත් හරියට කම්ප්ලේන් ආවා”. රමේෂ් කීවේය.

“දැන් මිනිස්සුන්ට තේරේනවා මේ අය පිටිපස්සේ හිටියේ කවුද කියලා. මහ බැංකුව මෙච්චරකල් නිදාගෙනයි ඉදලා තියෙන්නේ”. ප්‍රසන්න කීවේය.

සටහන – ගජබා නාගහවත්ත

Ad Widget

Recommended For You

About the Author: Editor

Leave a Reply

Your email address will not be published.