Political vs Political: සිරිකොත ගැටුම ගැන රවීගෙන් තද ප්‍රකාශයක්

එක්සත් ජාතික පක්ෂ නායක රනිල් වික්‍රමසිංහට පසුගිය සති දෙකම වෙහෙසකර සති දෙකක් වූවේ කොරෝනා වසංගතයෙන් පසු මහමැතිවරණයට ලහි ලහියේ ලැහැස්තිවීමට සිදුවීම නිසාය. වෙහෙස නොබලා කෘත්‍යාධිකාරින් මෙන්ම පක්ෂ ක්‍රියාකාරීන්ද අපේක්ෂකයන්ද සිරිකොත පක්ෂ මූලස්ථානයට ගෙන්වා සාකච්ඡා කළේ ඉදිරි මැතිවරණයට මුහුණ දෙන ආකාරය ගැනය.

එසේ සිරිකොතට පැමිණි ජාතික සේවක සංගමයේ සාමාජිකයන් පිරිසක් ප්‍රකෝපකාරීව හැසිරීම නිසා උණුසුම් තත්ත්වයක් ඇති විය. එවැනි රැස්වීමක් පැවැත්වෙන බව නායකයාට සිරිකොත පක්ෂ මූලස්ථානයෙන් දැනුම් දී තිබුණේ ඊට පෙර දින රාත්‍රියේය. පක්ෂය සාමාජිකයන් කැදවා තිබීම නිසා රැස්වීම අවලංගු නොකල නායකයා රැස්වීමට සහභාගී වූ අතර එහිදි යම් නොසන්සුන් තත්ත්වයක් උද්ගත විය.

නායකයා ඉකුත් බදාදා සිරිකොතට යාමට සුදානම්ව සිටියදී පාර්ලිමේන්තු මැති ඇමතිවරු ඇතුළු පක්ෂ ක්‍රියාකාරීන් රැසක් නයකයාගේ පස්වන පටුමගේ නිවසට පැමිණ සිටි බැවින් ඔවුන් සමග සාකච්ඡාවකට නායකයාද එක් විය.

“පක්ෂ මූලස්ථානය ඇතුලේ වෙච්ච දේ නොවෙන්න තිබුණ සිද්ධියක්. කව්රුත් මේක බැලුවේ නැද්ද?” වජිර අබේවර්ධන කතාවට මුලපිරීය.

“සිරිකොත කියන්නේ අපේ දෙවෙනි අම්මා.. එතන මෙහෙම දෙයක් වෙන්න දෙන්න බැහැ. මේ ආපු අය කව්ද කියලා බැලුවේ නැද්ද? ඇතුළට එන්න දොර ඇරියට පස්සේ වැඩක් නැහැ. එන අය කව්ද කියලා හොයලා බලන්න ඕනේ. නැත්නම් ඕන පිල්ලියක් මේක ඇතුළට එයි. කෘත්‍යාධිකාරි මණ්ඩල රැස්වීම තියන දවසට වෙනත් වැඩ දාගන්න හොද නැහැ.” රවී කරුණානායක කීවේය.

වජිරගෙන් රංගෙ බණ්ඩාරට මල්

“මොනවා වුනත් අන්තිමට බැණුම් ඇහුවේ නායකතුමා. අපේ අනිත් කණ්ඩායමට ඕන කරලා තිබුණේත් මේකම තමයි. පැහැදිලිවම මේක සැලසුමක්. තමන් හිටපු දෙවෙනි අම්මාගේ සෙවනට මෙහෙම කරලා ඔප්පු කළේ එයාලා දේශපාලන වාසිය වෙනුවෙන් තමන්ගේ අම්මා තාත්තාත් පාවිච්චි කරනවා කියන එකයි. ඒකනේ කට්ටිය බබාලා වගේ එයාලගේ කාර්යාලයටම ගියේ. කොහොමවුනත් එතනදීත් ඉන් පිටතදීත් රංගේ බණ්ඩාර වැඩකරපු විදිය හොදයි.” වජිර අබේවර්ධන කී දේ සැවොම අනුමත කළහ.

“කෘත්‍යාධිකාරි මණ්ඩලය පක්ෂ සාමාජිකත්වය අත් හිටුවමින් ගත් තීන්දුව අවලංගු කරන්න කියලා කට්ටියක් උසාවි ගිහිල්ලා තිබුණා. මොකක්ද මේ කාරණාව.” චම්පිකා ප්‍රේමදාස විමසා සිටියේය.

“එයාලා හිතුවේ එයාලා උසාවි ගිය ගමන් පක්ෂේ තීන්දුවට විරුද්ධව වාරණ නියෝගයක් දෙයි කියලායි. නමුත් ඒක වුනේ නැහැ. දැන් අපිට උසාවියට කරුණු වාර්තා කරන්න පුළුවන්. අනෙක එයාලගේ පක්ෂයට විරුද්ධව දාලා තිබුණ නඩුවේදිත් තහවුරු වුනා එයාලා එම පක්ෂයේ සාමාජිකත්වය අරන් කියලා. මේ සියළු කාරණා අපිට උසාවියට ගිහින් කියන්න පුළුවන්.” මහලේකම් අකිල පැහැදිලි කළේය.

“මෙවර මැතිවරණයට තරග කරන්නේ පක්ෂ දෙකක් විතරයි කියලා නායකතුමා සිරිකොතදි එදා ප්‍රසිද්ධියේ කිව්වා. මේකේ මොකක් හරි යටි අරුතක් තියෙනවා කියලා හැමොටම සැකයක් ඇති වෙලා තියෙනවා. මොකද 2015 දීත් ආණ්ඩුව හදන්නේ අපි කියලා නායකතුමා ඊට වසර ගණනාවකට කලින් කියලා තිබ්බානේ.” කේ.කේ පියදාස කී කතාවට නායකයා සිනා සුනා මිස කිසිවක් කීවේ නැත.

නවීන්ට සැකයක්

“මංගල සමරවිර හිටපු ඇමතිවරයා තමන් ඡන්දේ ඉල්ලන්නේ නැහැ. ඡන්දේ දෙන්නත් එපා කියලා ප්‍රසිද්ධියේ කියලා තියෙනවා. මෙතන යටි වැඩපිලිවෙලක් ක්‍රියාත්මක වෙන බවත් පේනවා. තවත් අය මෙහෙම වෙයිද?” නවින් දිසානායක ද කතාවට එක් වූවේ සිනා සෙමිනි.

“එක්සත් ජාතික පක්ෂය කඩාගෙන ගිය බොහෝ දෙනක් දැන් ඉච්ඡාභංගත්වයට පත් වෙලා. ඒ අය දැන් කරන්න දෙයක් නැතිව ඉන්නේ. ඒක නිසා මේ වගේ අය එක්ක කතා කරන්න නායකතුමා මාවත්, වජිර ඇමතිතුමාත් ඇතුළු පිරිසක් පත් කරලා තියෙනවා. අපි එතුමාට ඉදිරියේදි මේ ගැන වාර්තාවක් දෙනවා. ඊට පස්සේ බලමු.” දයා ගමගේ වැඩි විස්තරයක් කළේය.

“ඇමරිකාවට විරුද්ධව පැවැති උද්ඝෝෂණයට ප්‍රහාරයක් එල්ල වුනා. අපි මේවට විරෝධය පළ කරන්න ඕනේ”. කේ.කේ පියදාස කීවේය.

“ඔවුන්ගේ උද්ඝෝණය ආණ්ඩුව අනුමත නොකළත් මෙතනදි මිනිස්සුන්ට ගහපු එක වැරදියි. නිරෝධායන නීතිය යටතේ රැස්වෙන්න බැහැ කියපු පොලීසිය ඒ අයව ජිප්වලට පටවගෙන ගියේ නිරෝධායන නිතියට අනුවද කියලා මිනිස්සු ප්‍රශ්න කරනවා. මම නම් හිතන්නේ මෙතනදි ආණ්ඩුව කටයුතු කරපු ආකාරය නිවැරදි නැහැ. රටේ ජනතාව ප්‍රශ්න ගොඩක හිර වෙලා ඉන්නේ. ජල විදුලි බිල්පත් ගෙවා ගන්න බැරිව මිනිස්සු අසරණ වෙලා. ආදායම් නැතිව මිනිස්සු හිර වෙලා. මේ ගැන තමයි පෙරටුගාමින්ට උද්ඝෝෂණය කරන්න තිබුණේ.” නායකයා දීර්ඝ විස්තරයක් කළේය.

“තොණ්ඩමන්ගේ මිනිය රට පුරා දහස් ගණනක් මිනිස්සු එක්ක ගෙනිච්චා. සජිත් කළුතර කට්ටියක් එක්ක උද්ඝෝෂණය කළා. හැබැයි ඒවාට ක්‍රියාත්මක නොවුනු නිරෝධායන නිතිය මෙතනදි ක්‍රියාත්මක විම විහිළු සහගතයි.” වජිර අබේවර්ධනද නායකයාගේ කතාවට එකතු විය.

“ජනාධිපති අලුත් කාර්ය සාධක බලකායක් පිහිටුවලා තියෙනවා සුරක්ෂිත රටක්, විනයගරුක ගුණවත් හා නිත්‍යානුකූල සමාජයක් ගොඩනැගීමේ කාර්ය සාධක බලකාය කියලා. මෙතන ඉන්නේ හමුදා නිලධාරින් හා විශ්‍රමික හමුදා නිලධාරින්. මේක බරපතල ප්‍රශ්නයක්. රට මිලිටරි කරණයට ගෙන යන තවත් වැඩපිළිවෙලක් මේක. මේකට මොනව හරි කරන්න ඕනේ.” චම්පිකා ප්‍රේමදාස කතාව වෙන මගකට යොමු කළේය.

රනිල්ගෙන් බරපතළ අනාවැකියක්

“ඔව්. ඒක ඇත්ත. අපි නිවේදනයක් මේ ගැන නිකුත් කළේ ඒකයි. ආණ්ඩුක්‍රම ව්‍යවස්ථාව ප්‍රකාරව රාජ්‍ය නිලධාරින්ට නියෝග දෙන්න පුළුවන් ජනාධිපතිට, අගමැතිට හා කැබිනට් මණ්ඩලයට පමණයි. අගමැතිට ආණ්ඩුවේ ප්‍රධානියා හැටියට නියෝග දෙන්න පුළුවන්. මෙතනදි හමුදා නිලධාරින් පිරිසකට නිලධාරින්ට නියෝග දෙන්න වෙනවා. අමාත්‍යාංශ ලේකම් කෙනෙක් ඉන්නේ හමුදාපතිටත් ඉහලින්. එයාලට ජනාධිපති කාර්ය සාධක බලකායේ අය නියෝග දෙන්නේ කොහොමද? මෙහි බරපතලකම පේන්න තව කාලයක් යාවි.” නායකයා බැරෑරුම්ව පැහැදිලි කළේය.

“මැතිවරණ කොමිසමේ සාමාජික මහාචාර්ය හූල් කියපු දෙයකුත් අල්ලගෙන පොහොට්ටුවේ කටිටිය ලොකු නැටුමක් නටනවා නේද?” මහරගම නාගරික මන්ත්‍රී ජයමිණි කීවේය.

“හූල් කියනවා හොරුන්ටයි වංචනිකයන්ටයි ඡන්දය දෙන්න එපා කියලා. එතකොට පොහොට්ටුවේ අය කියනවා අපට ඡන්දේ දෙන්න එපා කියලා හූල් කිව්වා කියලා. අහක යන තොප්පි හරියටම දාගන්නවා කියන්නේ මේකට තමයි.” රවි කරුණානායක කීවේ සැවොම සිනා ගන්වමිනි.

“මැතිවරණ ක්‍රියාවලිය ගැනත් අපි බලන්න වේවි. ඡන්දයත් එන්න එන්නම ලංවෙන පාටක් තියෙන්නේ. මිටින් තියන්න වෙන්නෙත් අලුත් වැඩපිළිවෙලක් අනුවයි.” නවින් යළි හඩ අවදි කළේය.

“පොඩි පොඩි රැස්වීම්වලට පාක්ෂිකයෝ ඒවි. ඒත් හැමෝම එන්නේ නැහැ. ගොඩක්  අය නිවසින් එළියට එන්නේ නැහැ. එතකොට අපට නිවසින් එළියට නොඑන අයට පණිවුඩය යවන වැඩපිළිවෙලක් තියෙන්න ඕනේ. සිරිකොතට ගිහිල්ලා අපි මේ ගැන වැඩි විස්තර කතා කරමු. යැයි නායකයා කී විට සියලු දෙනා ඔහු සමග සිරිකොතට යාමට පිටත් වූහ.

සටහන – ගජබා නාගහවත්ත

Ad Widget

Recommended For You

About the Author: Editor

Leave a Reply

Your email address will not be published.