නුවරඑළියේ ප්‍රභූ දේශපාලනය අවසන් කර ‘නිර්ප්‍රභූ දේශපාලනය යුගයක්’ අරඹනවා – හිරන්‍යා හේරත්

නුවරඑළිය කියන්නේ පුංචි එංගලන්තය වුණාට, සංචාරක ආකර්ෂණය දිනාගත් ප‍්‍රදේශයක් වුණාට ඔබලා දන්නවා ඔබලා මුහුණ දෙන සමාජ-ආර්ථික ගැටලූවල නිමක් නැහැ. ඒක අපේ වතුකරයේ මිත‍්‍රයින් වගේම ගම්මානවල ජීවත්වන, නගරයේ ජීවත් වන සියලූ දෙනාම පොදුවේ මුහුණ දෙන අවාසනාවන්ත තත්ත්වයක්.

නුවරඑළියට වැටෙන වැස්ස මහවැලි ගග දිගේ පහළට ගලා ගෙන යනවා වාගේ නුවරඑළියේ සම්පත්වලින් ඵල ප‍්‍රයෝජන ගන්නේ නුවරඑළියේ ජනතාව නෙමෙයි. තේ වගාවේ ආදායමෙන් වතු කම්කරුවන්ට සෙතක් නැතිවා සේම, ගොවියන් ඇතුළු සියළු ජනයාට මෙම ආදායමෙන් කොටසක් නොලැබීමෙන් අද අපගේ ජනතාව අන්ත අසරණ තත්ත්වයට පත්ව ඇති බව නුවරඑළිය දිස්ත්‍රික්කය වෙනුවෙන් මෙවර මහා මැතිවරණය ඉදිරිපත්ව ඇති සමගි ජනබලවේගයේ නීතිඥ හිරණ්‍ය හේරත් මහත්මිය වලපනේ පැවැති සජිත් ප්‍රේමදාස මහතාගේ ප්‍රධානත්වයෙන් පැවති ජන රැළියකදි පැවසුවාය.

මෙම රැළියේදී ඇය වැඩිදුරටත් පවසා සිටියේ,

අද අපිට, නුවරඑළිය දිස්ත‍්‍රික්කයේ ජනතාවට සුවිශේෂ දවසක්. ලබන අගෝස්තු 05 වැනිදා පැවැත්වෙන මහ මැතිවරණයෙන් සමගි ජන බලවේගය ලබන නියත ජයග‍්‍රහණය විජයග්‍රහණයක් බවට පත්කරන ජයග‍්‍රාහී රැලිය තමයි මේ පැවැත්වෙන්නේ. ඒ නිසා මේ අවස්ථාවට පැමිණ සිටින ඔබ සියලූ දෙනා ඒ විජයග‍්‍රහණයේ හිමිකරුවන් පමණක් නොව සාක්ෂිකාරකයින් බවට ද පත් වෙනවා. මොකද නුවරඑළියෙන් හැමදාම ලැබූ වාර්තාගත ඡන්ද ප‍්‍රමාණය තමයි මෙවරත් සමගි ජන බලවේගයේ ජයග‍්‍රහණය විජයග‍්‍රහණය කරන්නේ.

අපේ නායකතුමා, ගරු සජිත් පේ‍්‍රමදාස මැතිතුමා අද අපේ බලකොටුව නුවරඑළියට පැමිණීම අප සැමටම අභිමානයක් වගේම ශක්තියක්. ඒ වගේම මම එය සලකන්නේ මා ලද පුද්ගලික ජයග‍්‍රහණයක්, වටිනාකමක් විදියටයි. ඊට හේතු කිහිපයක් තිබෙනවා. ඒ අතර වැදගත්ම කරුණ වන්නේ මගේ ආදරණීය මෑණියන්, ගරු රේණුකා හේරත් මැතිනිය, අපේ නායකතුමාගේ, සජිත් පේ‍්‍රමදාස මැතිතුමාගේ පියාණන් වූ රණසිංහ පේ‍්‍රමදාස මැතිතුමාගේ රජයේ සෞඛ්‍ය අමාත්‍යවරිය වශයෙන් කටයුතු කළා. එතුමන් ඒ ගැන මියයන මොහොත දක්වාම කතා කළා. ඒ වගේම එතුමිය තවත් වැදගත් දෙයක් ගැන නිතර නිතර කණස්සල්ලෙන් කතා කළා. ඒ තමයි පේ‍්‍රමදාස මැතිතුමාට ආණ්ඩුව කරගෙන යාමට ඉඩ නොදී කකුලෙන් ඇද්ද ප‍්‍රබලයින් ගැන. අවසානයේ එතුමාට දෝෂාභියෝගයක් ගෙනත් පක්ෂය විනාශ කළ ප‍්‍රබලයින් ගැන.

මා මෙහිදී, සමගි ජන බලවේගය බිහි වූ හැටි, එහි කාර්යභාරය, ජාතික වගකීම ගැන කියන්න යන්නේ නැහැ. එය ඔබලා සැමදෙනාම හොදාකාරවම දන්නවා. ඒත් මම එක් වැදගත් කරුණක් ගැන කියන්න අවසර ඉල්ලා සිටිනවා.

ඔබලා හොඳින්ම දන්නවා නුවරඑළියට හැමදාම කැබිනට් ඇමැතිකම් කිහිපයක් හිමි වුණා. ලංකා කම්කරු කොන්ග‍්‍රස ආණ්ඩුවට එක් වූ විට ප‍්‍රබලතම කැබිනට් ඇමැතිකම් හිමි වුණා. ඒ වගේම නුවරඑළියේ පවුල් පාලනයේ කේන්ද්‍රස්ථානයක් වන දිසානායක පවුලත් හැමදාම කැබිනට් ඇමැතිකම් දැරුවා. එක්සත් ජාතික පක්ෂ ආණ්ඩුවක් නොතිබුණත්, පක්ෂය කඩාගෙන ගිහින්, පාක්ෂිකයින් පවා දෙමින් ඇමැතිකම් ලබාගත්ත නුවරඑළියේ ප‍්‍රබලයෝ හිටියා. වැවිලි කර්මාන්ත අමාත්‍යාංශයට නුවරඑළියට ලියලා දීලා වගෙයි තිබුණේ.

ඒත් ඔබ හොඳින් දන්නවා මේ කිසිම ඇමැතිකමකින් නුවරඑළිය පොදුජනතාවට ලැබුණ සෙතක් නැහැ. ඒවා ප‍්‍රභූ පවුල්වල පුත්තුන්ට, ඥාතී මිත‍්‍රාදීන්ට සැප ගන්න, කම්සැප ගන්න, ධන නිධාන වෙලා තිබුණේ. මේ අමාත්‍යාංශ හරහා එක රැකියාවක් නුවරඑළියේ තරුණ – තරුණියන්ට ලැබුණේ නැහැ. එම රැකියාවල් වෙනත් දිස්ත්‍රික්ක වල අයටත්, මුදල් වලට විකුණු බවට හා ලිංගික අල්ලස් වලට ලබාදී ඇති බව ආරංචි ලැබෙමින් පවතිනවා.

නුවරඑළිය කියන්නේ පුංචි එංගලන්තය වුණාට, සංචාරක ආකර්ෂණය දිනාගත් ප‍්‍රදේශයක් වුණාට ඔබලා දන්නවා ඔබලා මුහුණ දෙන සමාජ-ආර්ථික ගැටලූවල නිමක් නැහැ. ඒක අපේ වතුකරයේ මිත‍්‍රයින් වගේම ගම්මානවල ජීවත්වන, නගරයේ ජීවත් වන සියලූ දෙනාම පොදුවේ මුහුණ දෙන අවාසනාවන්ත තත්ත්වයක්.

නුවරඑළියට වැටෙන වැස්ස මහවැලි ගග දිගේ පහළට ගලා ගෙන යනවා වාගේ නුවරඑළියේ සම්පත්වලින් ඵල ප‍්‍රයෝජන ගන්නේ නුවරඑළියේ ජනතාව නෙමෙයි. ලංකාවේ වැඩියෙන්ම එළවළු වගා කරන්නේ නුවරඑළියේ ගොවීන් වුණාට ඒවායේ මිල තීරණය කරන්නේ, ලාභය ගන්නේ ඔවුන් නෙමෙයි. ඔවුන්ට වගාවට අවශ්‍ය භූමියේ සිට, බීජ ටික දක්වා ගැටලූ තිබෙනවා. අස්වැන්නට නිසි මිලක් නැතිකම, මූල්‍ය ගැටලූ තිබෙනවා. ඒ වගේම අස්වැන්න ගබඩා කිරීමට නියමිත තැනක් නැතිවීම වගේ ගැටලූ තිබෙනවා. ඔවුන් දැඩි සූරා කෑමකට ලක්ව සිටිනවා. නුවරඑළියේ එළවළු ගොවීන්ගේ දැඩි සූරාකෑමකට ලක්ව සිටිනවා.

මේ තත්ත්වය දැන්වත් වෙනස් විය යුතුයි. දේශගුණ විපර්යාසවල බලපෑම නිසා නුවරඑළියේ වර්ෂාපතනය අඩුවෙලා තිබෙනවා. උෂ්ණත්වය ඉහළ ගොස් තිබෙනවා. මේවා ඍජුවම එළවළු වගාවට, වැවිලි කර්මාන්තයට, මල් වගාවට බලපානවා. ඒ නිසා මේ දේශගුණ විපර්යාසවලට මුහුණදීමට නම් නවීන කෘෂිකාර්මික දැනුමින් අපේ ගොවිජනතාව ශක්තිමත් කළ යුතුයි. ඔවුන්ට ඒ දැනුම සමග ඒවා ලබා ගැනීමට අවශ්‍ය මූල පහසුකම් ද සලසා දිය යුතුයි. මේ අභියෝගය ජය ගැනීමේ හැකියාව මට තිබෙනවා. අපේ නායකතුමාට තිබෙනවා. සමගි ජන බලවේගයට තිබෙනවා.

ඒ වගේම තමයි නුවරඑළියේ අති බහුතරය වන වතුකරයේ අපේ සහහෝදර සහෝදරියන් මුහුණ දෙන ගැටලූවල නිමක් නැහැ. වැවිලි කර්මාන්ත අමාත්‍යාංශය නුවරඑළියේ හාමුලාට සින්න වුණාට සින්නදොරේලාට ලැබුණ සහනයක් නැහැ. සිද්ධ වුණේ ඔවුන් තව තවත් දුප්පත්වීම, අසරණ වීම පමණයි.

ඔවුන්ගේ තරුණ පරම්පරාවේ ඉඩම් ගැටලූ, රැකියා ගැටලූවට වහාම විසඳුම් සෙවිය යුතුයි. වතුකරයේ තරුණ – තරුණියන් රජයේ රැකියාවක් ලබාගැනීම සිහිනයක් බවට පත්ව තිබෙනවා. ඔවුන්ට වතුකරයේම, නුවරඑළියේම අභිමානවත් පුරවැසියන් වශයෙන් ජීවත් වීමට අවශ්‍ය පරිසරය නිර්මාණය කළ යුතුයි. ඒ සඳහා රැකියා අවස්ථා වගේම, ව්‍යාපාරික අවස්ථා, වෘත්තීය අවස්ථා පුළුල් කළ යුතුයි.

නුවරඑළියේ කාන්තාවන් ගැන අපි වඩාත් අවධානය යොමුකළ යුතුයි. ඔවුන් සියවස් ගණනාවක් තිස්සේ දැඩි සූරාකෑමට ලක් වෙමින් තිබෙනවා. ඔවුන්ට දෙපයින් නැගී සිටමට අවශ්‍ය ශක්තිය ලබාදිය යුතුයි. සූරාකෑම නතර කළ යුතුයි.

ඔබලා හොඳින්ම දන්නවා වතුරයේ කාන්තා හිංසනය, ළමා අපයෝජන ඉහළටම ගිහින්. ඒකට හේතුව දුප්පත්කම සහ මත්වතුර භාවිතයයි. වතුකරයේ ලොකුම ශාපය බවට මත්ද්‍රව්‍ය හා මත්වතුර බවට පත්ව තිබෙනවා. අපි ඒවා තුරන් කර අපේ කාන්තාවන්ගේ, ළමුන්ගේ ජීවිත සුරක්ෂිත කළ යුතුයි. මත් රකුසාගෙන් වතුකරය මුදාගත යුතුයි. එය කළ හැකි වන්නේ ශක්තිමත් දැක්මක් ඇති පාලනයකට පමණයි.

ලංකාවේ කාන්තාවන් අති බහුතරයක් මුහුණ දී සිටින මහා ව්‍යසනයක් වන ක්ෂුද්‍ර මූල්‍ය මාෆියාව අද වතුකරයේ, නුවරඑළියේ කාන්තාව බිළිගනිමින් සිටිනවා. දුප්පත්මක, ආර්ථික අවස්ථා අහිමි වීම නිසා තමයි අපේ කාන්තාවන්, කුඩා ව්‍යාපාරිකයින් මේ උඟුලට වැටිලා තිබෙන්නේ. ඒ නිසා කාන්තාවන්ගේ ආර්ථික ශක්තිය වර්ධනය කිරීම තුළින් මේ ගැටලූවට විසඳුම් සොයන්න අපි බලාපොරොත්තු වෙනවා.

මෙහිදී තවත් වැදගත් කරුණක් ගැන කතා කළ යුතුයි. අපේ කාන්තාවන්, ළමුන් දැවැන්ත සෞඛ්‍ය ගැටලූවලට මුහුණ දෙමින් සිටිනවා. ඊට ප‍්‍රධාන හේතුව ඔවුන්ගේ දුප්පත්කම සහ ආර්ථික අවස්ථා අහිමි වීමයි. ඒ වගේම පසුගිය කාලය පුරාම නුවරඑළියේ සෞඛ්‍ය සේවා පහසුකම් දියුණු වෙලා නැහැ. අද ලංකාවේ ජනගහනයට සාපේක්ෂව අඩුම වෛද්‍යවරුන් සංඛ්‍යාවක් සිටින්නේ නුවරඑළිය දිස්ත‍්‍රික්කයෙයි. ලංකාවේ ඒ අනුපාතය 1:750ක් වෙන කොට නුවරඑළියේ අනුපාතය 1:3000ක් පමණ වෙනවා. ඔබට ඒකෙන්ම හිතා ගන්න පුළුවන් නුවරඑළියේ සෞඛ්‍ය ගැටලූවල තත්ත්වය.

අධ්‍යාපන අතින් බැලූවත් තත්ත්වයේ වෙනසක් නැහැ. නුවරඑළියේ ප‍්‍රමාණවත් තරම් ගුරුවරුන් නැහැ. පාසල්වල පහසුකම් නැහැ.

මේකට ප‍්‍රධානතම හේතුව රාජ්‍ය නිලධාරීන්, වෘත්තිකයින් නුවරඑළියට ඒමට අකමැති වීමයි. ඒකට හේතුව ඔවුන්ට අවශ්‍ය පහසුකම්, නිල නිවාස ආදිය නැකිතමයි. ඒ නිසා ඔවුන් නුවරඑළිය සලකන්නේ දුෂ්කර ප‍්‍රදේශයක් විදිහටයි.

අපේ සැලසුම වන්නේ වසරකට වරක් සැප ගන්න එන රාජ්‍ය නිලධාරීන්, වෘත්තිකයින් වැඩකරන්න එන තැනක් බවට නුවරඑළිය පත් කිරීමයි. ඒ සඳහා අවශ්‍ය සියලූ සැලසුම් අප සතුව තිබෙනවා. අපි නුවරඑළිය සැප ගන්න තැනක් වගේම – වැඩ කරන තැනක් බවටත් පත් කරනවා.

ගරු නායකතුමනි, මගේ කතාව අවසන් කිරීමට පෙර අනාවැකියක් කිරීමට මම ඔබතුමාගෙන් අවසර ඉල්ලා සිටිනවා. ඒ අනාවැකිය තමයි සමගි ජන බලවේගය මේ මහා මැතිවරණයෙන් ලබන ජයග‍්‍රහණය විජයග‍්‍රහණයක් බවට පත් කරන්නේ මේ නුවරඑළියේ ජනතාවයි.

ඒ වගේම අපි මෙම මහ මැතිවරණයෙන් පසුව නුවරඑළියේ දූෂිත රාජපක්ෂ හිතවාදී ප‍්‍රභූ පවුල් පාලනය අවසන් කරනවා. ඔබතුමා රාජපක්ෂ පවුල් පාලනය අවසන් කරන විට අපි නුවරඑළියේ ප‍්‍රභූ පවුල් පාලනය අවසන් කර ඔබතුමාගේ නායකත්වය යටතේ පොදුජන යුගයක් බිහි කරනවා.

අවසන් වශයෙන් මා මෙතැනට පැමිණි, නොපැමිණි සියලූම අයගෙන් ඉල්ලීමක් කරන්න කැමතියි. අපි ඔබ ප‍්‍රාර්ථනා කළ නායකයා අපගේ අනාගතය භාර ගෙන තිබෙනවා. අපි සමග දූෂිතයෝ නැහැ, ඝාතකයෝ, ප‍්‍රජා පීඩකයෝ නැහැ. ඒ නිසා නොබියව අප සමග එක්වන්න. අගෝස්තු 05 වැනිදාට ඡන්දපොළට යන්න. දුරකථනය ඉදිරියේ ඔබේ වටිනා ඡන්දය ප‍්‍රකාශ කරන්න. සජිත් පේ‍්‍රමදාස මහතාගේ නායකත්වයෙන් බිහිවන නව පොදුජන යුගයේ හවුල්කාරයින්, සාක්ෂිකාරයින් වන්න කියලා මම ඔබගෙන් ඉල්ලා සිටිනවා.

Ad Widget

Recommended For You

About the Author: Editor

Leave a Reply

Your email address will not be published.