ඇතැම් භික්ෂූන් වහන්සේලා පාර්ලිමේන්තු අසුනකට අරගල කරනවා – අගමැති මහින්ද

ඇතැම් භික්ෂූන් වහන්සේලා පාර්ලිමේන්තු අසුනක් වෙනුවෙන් අරගල කරන විට අති පූජ්‍ය කොටුගොඩ ධම්මාවාස නාහිමියෝ සුවිශාල ශාසනික මෙහෙවරක් ඉටුකරමින් සිටින බව අගමැති මහින්ද රාජපක්ෂ මහතා පවසයි.

ශ්‍රී ලංකා අමරපුර මහා නිකායේ සංඝ සභා කාර්යාලය විවෘත කිරීම අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් ඊයේ  (15) පස්වරුවේ සිදුකෙරුණ අතර එම අවස්ථාවේ අගමැතිවරයා මේ බව සදහන් කළේය.

වසර 200කට අධික කාලයක් ස්ථිර ලිපියනයක් සහිත මධ්‍යස්ථානයක් හෝ ගොඩනැගිල්ලක් නොතිබූ ශ්‍රී ලංකා අමරපුර මහා නිකාය වෙනුවෙන් මෙම ගොඩනැගිල්ල සඳහා මීට වසර 9කට පෙර මෙම ඉඩම පරිත්‍යාග කර ඇත්තේ එවක ජනාධිපති වත්මන් අගමැති මහින්ද රාජපක්ෂ මහතා විසින් වීම ද විශේෂත්වයක්.

මෙම තෙමහල් ගොඩනැගිල්ල අමරපුර මහා නිකායේ පාර්ශ්ව 22හිම ශාසනික කටයුතු සඳහා ප්‍රයෝජනයට ගැනීමට සුදුසු වන සේ නිමවා ඇති අතර ගොඩනැගිල්ල නම් කර ඇත්තේ මෙරට සම්බුද්ධ ශාසනය වෙනුවෙන් අතිමහත් මෙහෙයක් ඉටු කරන ලද “ශ්‍රීමත් සිරිල් ද සොයිසා” මහතාගේ නමිනි.  

මෙහිදී අදහස් දැක්වූ අගමැති මහින්ද රාජපක්ෂ මහතා මෙසේ සදහන් කළා.ෙ

‘මහනුවර යුගයේ දී පැවදි උපසම්පදාව එක කොටසකට පමණක් සීමා වුණා. මේ නිසා සියලු ශ්‍රී ලාංකික කුලපුත්‍රයන්ට පැවදි උප සම්පදාව ලබාගත හැකි වන ආකාරයට ශ්‍රී ලංකා අමරපුර මහා නිකාය බිහි වුණ බවටයි සාසන ඉතිහාසයේ සදහන් වන්නේ.

උගත්, බුද්ධිමත් සඟ පරපුරක් බිහි කිරීමට අමරපුර නිකාය දායක වුණා. ඒ අනුව වස්කඩුවේ ශ්‍රී සුභූති හාමුදුරුවෝ, පොල්වත්තේ බුද්ධදත්ත හාමුදුරුවෝ, මඩිහේ පඤ්ඤාසීහ හාමුදුරුවෝ, පිංවත්තේ දේවානන්ද හාමුදුරුවෝ, බම්බලපිටියේ නාරද හාමුදුරුවෝ, වජිරාරාම විහාර වාසී පියදස්සී හාමුදුරුවෝ, හීනටියන ධම්මාලෝක හාමුදුරුවෝ, දවුල්දෙන ඥානිස්සර හාමුදුරුවෝ වගේ කීර්තිමත් යතිවරයන් වහන්සේලා බොහෝ පිරිසක් අමරපුර නිකායෙන් බිහි වුණා.

අති පූජ්‍ය කොටුගොඩ ධම්මාවාස නායක හාමුදුරුවෝ තමයි අමරපුර මහා නිකායේ වත්මන් නාහිමියන් වන්නේ. උන් වහන්සේ උත්තරීතර මහා නායක පදවියට පත් වුණේ 2017 වර්ෂයේදීයි. උන් වහන්සේ දහස් ගණන් ධර්ම දේශනා පවත්වනු ලැබුවා. අපේ නායක හාමුදුරුවෝ අති විශාල ශාසනික සේවයක් ඉටුකරමින් සිටිනවා. මම උන් වහන්සේට දීර්ඝායුෂ ප්‍රාර්ථනා කරනවා.

ඇතැම් භික්ෂූන් වහන්සේලා පාර්ලිමේන්තු අසුනක් බෙදා ගැනීමට අරගල කරද්දී මෙවැනි ශාසනික සේවාවක් ඉටුවනු දැකීම පවා සතුටට කරුණක්. අද දින අභිනවයෙන් සඟ සතු කරනු ලැබූ මෙම සංඝ සභා කාර්යාල සංකීර්ණය මෙරටට සුවිශාල ශාසනික මෙහෙවරක් ඉටුකරන කේන්ද්‍රස්ථානයක් වේවායි කියලා මම ප්‍රාර්ථනා කරනවා‘ යැයි ද අගමැති මහින්ද රාජපක්ෂ මහතා සදහන් කළේය

Ad Widget

Recommended For You

About the Author: Editor(T)

Leave a Reply

Your email address will not be published.