2020 IPL: ඉන්දු – චීන විරසකය ඉන්දීය ක්‍රිකට් ක්‍රීඩාවටත්

ඉන්දීය ප්‍රිමියර් ලීග් තරගාවලියේ 2019 ශූරතාව හිමි කර ගත් මුම්බායි ඉන්ඩියන්ස් කණ්ඩායමට ජයග්‍රහණය ලබා දීම සදහා මූලිකත්වය ගත්තේ ලසිත් මාලිංග ය

මෙවර ඉන්දීය ප්‍රිමියර් ලීග් තරඟාවලියේ ‘නාම අනුග්‍රාහකත්වයෙන්’ (title sponsor) චීන ස්මාර්ට් ජංගම දුරකථන නිෂ්පාදන සමාගමක් වන Vivo ඉවත් කළ බව ඉන්දීය ක්‍රිකට් පාලක මණ්ඩලය නිවේදනය කළේය.

Vivo සමාගම ඩොලර් මිලියන 300ක මුදලක් ගෙවා 2018 දී පස් වසරක අනුග්‍රාහක කොන්ත්‍රාත්තුවක් අත්සන් කර තිබුණි.

ඉන්දීය ක්‍රිකට් පාලක මණ්ඩලය මෙම පියවර ගෙන ඇත්තේ ඉන්දියාව තුළ චීන විරෝධී මත රැල්ලක් උත්සන්න වෙමින් පවතිද්දීය.

ඉන්දු – චීන දේශසීමාව මත දෙරටේ හමුදා භටයන් අතර මෑතකදී ඇති වූ ගැටුම, ඉන්දියාව තුළ චීන විරෝධී මත රැල්ලක් බිහිවීමට හේතු විය.

එම ගැටුමින් ඉන්දීය සොල්දාදුවන් විසිදෙනෙකු ජීවිතක්ෂයට පත් විය.

ඉන් අනතුරුව, ඉහත කී චීන සමාගම ඉන්දීය ප්‍රිමියර් ලීග් තරඟාවලියේ (IPL) අනුග්‍රාහකත්වයෙන් ඉවත් නොකර සිටීම පිළිබඳව ඉන්දීය ක්‍රිකට් පාලක මණ්ඩලය දැඩි විවේචනවලට ලක් වෙමින් පැවතුනි.

ඉන්දීය ප්‍රිමියර් ලීග් තරඟාවලිය වනාහි ලොව ධනවත්ම ක්‍රීඩා තරඟවලින් එකකි
ඉන්දීය ප්‍රිමියර් ලීග් තරඟාවලිය වනාහි ලොව ධනවත්ම ක්‍රීඩා තරඟවලින් එකකි

කෙටි නිවේදනයක් නිකුත් කරමින් ඉන්දීය ක්‍රිකට් පාලක මණ්ඩලය සඳහන් කර ඇත්තේ Vivo සමගම සමඟ පවතින අනුග්‍රාහක සහකාරිත්වය 2020 වසර සඳහා “අත්හිටුවීමට තීරණය කර” ඇති බවය. ඒ පිළිබඳව වැඩි විස්තර එම නිවේදනයේ සඳහන් කර නොමැත.

TikTok

ඉන්දීය ප්‍රිමිය ලීග් තරඟාවලිය සඳහා සම්බන්ධ වී සිටින තවත් සමාගම් කිහිපයක් ම චීනයට සම්බන්ධකම් පවතී.

කෙසේ වෙතත්, TikTok ඇතුළු චීන පරිගණක ඇප් උපාංග 59ක් තම රට තුළ තහනම් කිරීමට ඉන්දියාව පසුගිය දා පියවර ගත්තේය.

ඉන්දීය ක්‍රිකට් පාලක මණ්ඩලය මේ මස මුලදී නිවේදනය කර සිටියේ 2020 ඉන්දීය ප්‍රිමියර් ලීග් තරඟාවලිය සැප්තැම්බර් 19 වැනිදා පටන් එක්සත් අරාබි එමීර් රාජ්‍යයේ පැවැත්වෙනු ඇති බවය.

ඒ අනුව අවසාන මහා තරඟය ඇතුළුව, එම තරඟාවලියට අයත් තරග 53ක් ඩුබායි, ශාජා සහ අබු ඩාබි යන නගරවල පැවැත්වීමට නියමිතය.

අවසාන මහා තරඟය පැවැත්වීමට සැලසුම් කර ඇත්තේ නොවැම්බර් 10 වැනිදා ය.

මෙම විස්සයි විස්ස (Twenty20) තරගාවලිය මුලදී ආරම්භ වීමට නියමිතව තිබුණේ පසුගිය මාර්තු 29 වැනිදාය. නමුත් කොරෝනාවෛරස් වසංගතය ලොව පුරා පැතිරයාමත් සමඟ එය කල් දැමීමට සිදු විය.

බොලිවුඩ් තරු

ඉන්දීය ප්‍රිමියර් ලීග් තරඟාවලිය වනාහි ලොව ධනවත්ම ක්‍රීඩා තරඟවලින් එකකි. ක්‍රීඩාවට සම්බන්ධ බොහෝ බලවතුන් රැසක් එයට එක් වී සිටිති.

IPL තරඟාවලියට සහභාගී වන විස්සයි විස්ස ක්‍රිකට් කණ්ඩායම්වල අයිතිය ජනප්‍රිය බොලිවුඩ් තරු සහ මහා ධන කුවේරයන් සතුය.

තම කණ්ඩායමට දක්ෂ ක්‍රීඩකයන් මිලදී ගැනීම සඳහා ඔවුහු මිලියන ගණනින් මුදල් වැය කරති.

මෙවර ඉන්දීය ප්‍රිමියර් ලීග් ක්‍රිකට් තරඟාවලිය සඳහා එංගලන්ත ක්‍රිකට් ක්‍රීඩකයන් එකොළොස් දෙනෙකු ද සහභාගී වීමට නියමිතව තිබුණි. ක්‍රිකට් ලෝක කුසලානය හිමිකරගත් බෙන් ස්ටෝක්, ඕවන් මෝගන් සහ ජොස් බට්ලර් ද ඒ අතර විය.

රාජස්ථාන් කණ්ඩායම විසින් පවුම් මිලියන 1.4කට බෙන් ස්ටෝක් මිල දී ගනු ලැබිණි. එමෙන්ම මෝගන්, බට්ලර් සහ ටොම් කුරන්ට දල වශයෙන් පවුම් 500,000ක් බැගින් වටිනා කොන්ත්‍රාත්තු හිමි විය.

ආබාධයකට ගොදුරු වීම හේතුවෙන් ජෝෆ්රා ආචර්, රාජස්ථාන් කණ්ඩායමේ කොන්තරාත්තුවෙන් ඉවත් විය.

ඉන්දීය ප්‍රිමියර් ලීග් තරගාවලියේ 2019 ශූරතාව හිමි කර ගත් මුම්බායි ඉන්ඩියන්ස් කණ්ඩායමට ජයග්‍රහණය ලබා දීම සදහා මූලිකත්වය ගත්තේ ලසිත් මාලිංගය.

එක්දින සහ T20 ක්‍රිකට් ඉතිහාසයේ අඛණ්ඩව පන්දු 4කදී කඩුලු 4ක් දවා ගැනීමට සමත් වූ එක ම පන්දු යවන්නා ලසිත් මාලිංග වේ.

Ad Widget

Recommended For You

About the Author: Editor(T)

Leave a Reply

Your email address will not be published.