Hot Plate: ගව ඝාතන තහනමේ ‘නොපෙනෙන පැත්ත ගැන’ රනිල් කළ හෙළිදරව්ව

සටහන – ගජබා නාගහවත්ත

එ.ජා.ප නායකත්වය හා ජාතික ලැයිස්තු අර්බුදයට අවසන් විසදුම් ලැබී නැති හෙයින් නායක රනිල් සිරිකොත මෙන්ම වෙනත් ස්ථානවලට ගිය විටද බොහෝ දෙනෙකු විමසන්නේ ඒ පිළිබදවය.

“ජාතික ලැයිස්තුව පත් කිරීමට කලින් අනිත් ප්‍රශ්න විසද ගන්න ඕනේ. ඒකට සියළු දෙනා එක්ක කතා කරනවා. පක්ෂ සභාපති හා නියෝජ්‍ය නායක ආදී ප්‍රධාන තනතුරු මාස දෙකකට වඩා හිස්ව තියන්නත් බැහැ. නව උපක්‍රම හරහා පක්ෂ ප්‍රතිසංවිධානය ගැනත් අවධානය යොමු කරනවා.” නායකයා පිළිතුරු දුන්නේය.

“එ.ජා.ප මහාලේකම් නායකත්වයත් ඉල්ලුවා. ඔහු දිගටම වැඩකරනවාද?” එය නායකයාට යොමුවූ තවත් ප්‍රශ්නයකි.

“අකිල නායකත්වයට ඒම් කලාට දැන් එතන නෑ වගෙයි පේන්නේ. මහාලේකම්කමටත් පූර්ණ කාලීන කෙනෙක් පත් කරන්නයි යෝජනා තියෙනවා. වෙනසක් වුනොත් අකිලට දෙන තනතුර ගැන වෙනමම හිතන්න වේවි. දිගටම තනතුරු පුරප්පුඩු තියාගෙන පක්ෂය අඩපණ කරන්න බෑ. පළාත් සභා ආවොත් ඒකට මුහුණ දෙන්න තියෙනවා.” නායකයාගෙන් ඊට ලැබුනේ එවැනි ප්‍රතිචාරයකි.

ප්‍රේමලාල් පාර්ලිමේන්තු ගෙන ඒම ගැන සදාචාරාත්මක ප්‍රශ්නයක් තියෙනවා. ඒකට නීතිමය පදනමක් තියේද කියන එකයි වැදගත් වෙන්නේ. විපක්ෂය මතු පිටින් අත ගාන විරෝධතා දක්වලා බෑ.

“පළාත් සභා ගැනයි, බැසිල් පාර්ලිමේන්තු ගෙන ඒම ගැනයි ආණ්ඩුව ඇතුලේ ගිනියම් වෙලා කියලා ආරංචියි. ඒ වගේම 20 වෙනි සංශෝධනය හා ප්‍රේමලාල් පාර්ලිමේන්තු ගෙන ඒම ගැනත් ආණ්ඩුව ඇතුලේ මත දෙකක් තියෙනවා නේද?” එය නායකයාට යොමු වූ තවත් ප්‍රශ්නයකි.

“ප්‍රේමලාල් පාර්ලිමේන්තු ගෙන ඒම ගැන සදාචාරාත්මක ප්‍රශ්නයක් තියෙනවා. ඒකට නීතිමය පදනමක් තියේද කියන එකයි වැදගත් වෙන්නේ. විපක්ෂය මතු පිටින් අත ගාන විරෝධතා දක්වලා බෑ. නීතිමය පදනමක් තුල කටයුතු කිරීම හා සදාචාරාත්මක හා නිවැරදි දේ කරන්න කතානායකට බල කරන තත්ත්වයකුයි අවශ්‍ය වෙන්නේ. ඒ වගේම ආණ්ඩුවට තුනෙන් දෙක තිබුණා කියලා 19 යේ ප්‍රජාතන්ත්‍රවාදී ස්වරූපය විනාශ කිරීමට හා වරදකරුවෙකු පාර්ලිමේන්තු ගෙනඒම සුදුසු දැයි සමාජය නගන ප්‍රශ්නවලින් පලා යන්න බෑ.” නායකයාගේ විග්‍රහය එය විය.

2010 දී සිරගතව සිටි මන්ත්‍රී සරත් ෆොන්‍සේකා පාර්ලිමේන්තු ගෙන ඒමට එරෙහිව ජි.එල් පීරිස් නැගු 89 (ඈ) තර්කය මත පදනම්ව ප්‍රේමලාල් ජයසේකර කිසිසේත්ම පාර්ලිමේන්තු ගෙන ආ නොහැකි බවට විශාල තර්ක පවතියි. සිරිකොතේදි ඒ ගැන අදහස් පළ කළ එ.ජා.ප නීති නිලධාරියෙකු කීවේ අමතු කතාවකි.

“ජි.එල් ගේ නීති තර්ක හැමදාම අනාථ වුනා. චන්ද්‍රිකාගේ පැකේජ් එකටත් අත්වූ ඉරණම රටට මතකයි. ඒ නිසා ඔහුගේ 89 (ඈ) තර්කයත් කතාවක් විතරයි. ඒ වගේම එංගලන්තය, ඉන්දියාව වැනි රටවල් වල පූර්වාදර්ශ හා නිතිමය පදනමයි බැලිය යුත්තේ. තුනෙන් දෙකක් තිබුණා කියා සියල්ල බැරි බව ආණ්ඩුව තේරුම් ගන්න ඕනෑ. තුනෙන් දෙකක් ලැබුණහම ආණ්ඩුවකට එය ශක්තියක් වගේම විනාශයක ආරම්භයක් බවත් ඒකාන්තයි. විපක්ෂයට කරන්න පුළුවන් සමාජ මතයක් හැදීම විතරයි.” එහිදි කියවින.

2015 පරාජයේදී මහින්ද, ගෝඨාභය හා නාමල් රටතුල සිටියදී බැසිල් රටින් පිටව යාමත් ඊට පෙර ගාමිණි දිසානායක සමග එ.ජා.ප යේ සිටි අවස්ථාවේදීත් ගාමිණිගේ වැටීමත් සමග ඔහු රට හැර යාම වැනි කරුණු බැසිල්ට අවාසි සහගත ලෙස බලපාන බවද එහිදි සංවාදයට ලක්විය.

තවද ආණ්ඩුව තුල මෙන්ම පිටතත් බැසිල් ට එරෙහි විශාල විරෝධතා පවතින බවටද එහිදි මත පළවිය. 2015 පරාජයේදී මහින්ද, ගෝඨාභය හා නාමල් රටතුල සිටියදී බැසිල් රටින් පිටව යාමත් ඊට පෙර ගාමිණි දිසානායක සමග එ.ජා.ප යේ සිටි අවස්ථාවේදීත් ගාමිණිගේ වැටීමත් සමග ඔහු රට හැර යාම වැනි කරුණු බැසිල්ට අවාසි සහගත ලෙස බලපාන බවද එහිදි සංවාදයට ලක්විය.

“එ.ජා.ප යේ 74 වෙනි සංවත්සරය දියාරු ලෙස කලා කියලා ජනමාධ්‍ය විශාල ප්‍රචාරයක් ගෙනිච්චා.” එය නායකයාට යොමුවූ තවත් ප්‍රශ්නයකි.

” ලංකාවේ කොරෝනා ඉවරයි කියලා හිතුවොත් එය භයානක මානසිකත්වයක්. එ.ජා.ප සංවත්සරයට සෙනග නොගෙනාවේ කොරෝනා අනතුර නිසයි. ජනමාධ්‍යයට දැන් කොරෝනා ගැන රුදාවක් නැතිවීම අවාසනාවක්. අතලග තියෙන ඉන්දියාව කොරෝනා නිසා විනාශ වෙලා. එංගලන්තයේ 6 දෙනෙකුට වඩා රැස් වෙන්න බෑ කියලාත් ගෙවල් දෙකක අයට පමණක් එකතු විය යුතු බවටත් සිමා පනවලා තියෙනවා. රෑ 10 ඉදලා ඇදිරි නීතිය දැමිම ගැනත් ඔවුන් හිතනවා. ඒත් ලංකාවේ ආණ්ඩුවයි ජනමාධ්‍යයි දැන් කොරෝනායි ඩෙංගුයි අමතක කරලා තුනෙන් දෙකයි 20 වෙනි සංශෝධනයයි ප්‍රේමලාලුයි කරේ තියන් යනවා.” නායකයා කළ විග්‍රහය කාගේත් පැසසුමට ලක්විය.

“ඒ වගේම “ෆොරින් පොලිසි” සගරාවට අයි.එම්.එෆ් එකේ ප්‍රධානීන් දෙන්න විශේෂ ප්‍රකාශයක් කරලා තිබුණා. ලෝක ආර්ථිකය ඩොලර් ට්‍රිලියන 12 කින් අවපාතයට ලක්වෙලා කියලා ඔවුන් දැඩි ලෙස ඉස්මතු කලා. ඒ වගේම ලංකාවේ ආර්ථිකය දැන් සෘණ 1.6 ට වැටිලා. බඩු මිල 63% කින් ඉහළට ගිහිල්ලා කියලා මහ බැංකු ආරංචි මාර්ග කියනවා.” එ.ජා.ප නායකයා වැඩිදුරටත් කීවේය.

තවද ආණ්ඩුව සිදු කරන පරිසර විනාශය මෙන්ම ගව ඝාතනයට අදාල තීන්දුව ගැනද එහිදි අවධානය යොමු විය.

“හරක් මස් ගැන තීන්දුව සිංහල බෞද්ධයන් තවදුරටත් රවටා ගැනීම මෙන්ම මුස්ලිම්වරුන්ටත් සෘජු ප්‍රහාරයක් එල්ල කිරීම යටි අරමුණ විය හැකියි. හරක් මස් පරිභෝජනය කරන්නේ ඔවුන් විතරක් නොවෙයි කතෝලික මෙන්ම සිංහල සමාජය තුලත් ඒ මස් පරිභෝජනය වෙනවා. පිටරටින් හරක් මස් ගෙනත් අඩු මිලට දෙන්න බෑ. බදු ඉවත් කළොත් ආර්ථිකය ඉවරයි. සංචාරකයන් එන්න පටන් ගත්තහම ඔවුන් ඉල්ලන මස් දෙන්නේ කොහොමද? ඉන්දියාව තුලින් මස් පිටට යවන්නත් බෑ ඇතුළට ගේන්නත් බෑ. එහෙම නම් අපිට යුරෝපය දකුණු ඇමරිකාව හෝ ඕස්ට්‍රේලියාවෙන් අධික මිලට මස් ගෙන ඒමේ හැකියාව තියෙනවද? අනෙක එක හරකෙකු වෙනුවෙන් කුකුල්ලු 200 ක් විතර බිලි දෙන්න වේවි. පරිසරය වනසලා. කැලෑවේ ඉන්න අපේ මුව ගෝන්නු සහ වල් ඌරන්ගේ ඉරණමත් මේකෙන් විශාල අභියෝගයකට ලක් වෙනවා. සිංහල බෞද්ධ රටක ගව ඝාතනය නැවැත්වීම දිරි දිය යුත්තක්. ඒත් ඒකට විකල්ප ක්‍රියාමාර්ග නොයොදා ක්ෂණිකව මෙවැනි තීන්දු ගැනීමෙන් නැති අවුල් ඇති වෙනවා.” එ.ජා.ප ඉහල නිලධාරියෙකු කළ විග්‍රහය නායකයා ඇතුළු සියළු දෙනා අනුමත කළහ.

සටහන – ගජබා නාගහවත්ත

Ad Widget

Recommended For You

About the Author: Editor(T)

Leave a Reply

Your email address will not be published.