කොවිඩ්වලින් ආරක්ෂාවීම හිතන තරම් පහසු නෑ – මහාචාර්ය නීලිකා මලවිගේ

කොවිඩ්-19 වෛරසයෙන් ආරක්ෂා වීම සදහා මීටරයක දුර පවත්වාගෙන යෑම සෑම පරිශ්‍රයකටම අදාළ නොවන අතර තමන් අන් අය සමග ගත කරන කාලය මෙන්ම කතා කරන හඬේ ප්‍රබලතාව කෙරෙහිද අවධානය යොමු කළ යුතු බව ශ්‍රී ජයවර්ධනපුර විශ්ව විද්‍යාලයේ මහාචාර්ය නීලිකා මලවිගේ මහත්මිය පවසනවා.

කොවිඩ්-19 වෛරසයේ නව ප්‍රවණතා ගැන අප කළ විමසීමකට පිළිතුරු වශයෙනුයි මහාචාර්ය මලවිගේ මහත්මිය මේ බව ප්‍රකාශ කළේ.

මෙහිදී කොවිඩ් වෛරසයේ පැතිරීම සහ ආසාදනය වීම ගැන වැඩි දුරටත් අදහස් දක්වමින් ඇය මෙසේද පැවසුවාය.

‘‘නිතර අත් සේදීම, මුහුණු ආවරණ පැළදීම සහ මීටරයක් දුර පවත්වා ගැනීම කොරෝනා වෛරසය පැතිරීම වැළක්වීම සඳහා අනුගමනය කරන ප්‍රධාන සෞඛ්‍ය පුරුදු වශයෙන් තව දුරටත් පවතිනවා. එහෙත් ඒවා පමණක් ප්‍රමාණවත් නොවන බව මේ වන විට හදුනා ගෙන තිබෙනවා. මීටරයක දුර පවත්වාගෙන යෑම සෑම පරිශ්‍රයකටම අදාළ නොවන අතර තමන් අන් අය සමග ගත කරන කාලය මෙන්ම කතා කරන හඬේ ප්‍රබලතාව කෙරෙහිද අවධානය යොමු කළ යුතුව තිබෙනවා. විශේෂයෙන් ආපනශාලා, හෝටල් සහ ජනයා වැඩිපුර ගැවෙසෙන සංවෘත ස්ථානවලදී මේ ගැන වැඩි වශයෙන් සැලකිලිමත් විය යුතුයි‘‘

‘අපි සංවෘත පරිසරයක් ගැන කතා කරනවා නම් මුහුණු ආවරණ දාගෙන හිටියත්, මීටරයක් ඈතින් හිටියත් ඒ වගේ අවස්ථාවක A/C එකෙන් වාතය සංචරණය වන විට කොවිඩ් අසාදිත පුද්ගලයෙක් ගෙන් ඒ වෛරසය පිටවෙලා කාමරේ ඇතුළෙම සංචරණය වෙන්න පුළුවන්. ඒ නිසා අපි එවන් තැනක ගත කරන කාලය අවදානම්. ඒ වගේම කතා කරන ස්වරයත් ඉතාම වැදගත්.”

‘‘ශබ්ද නගා කතා කිරීම වැනි ක්‍රියා වලින් රෝග කාරක වෛරස වැඩි දුරකට පැතිර යෑමේ වැඩි අවදානමක් තිබෙනවා. හොදින් වාතාශ්‍රය සහිත, එළිමන් නිදහස් ස්ථානවල එම අවදානම සංවෘත ස්ථානයකට වඩා අඩුයි. ආපන ආපනශාලාවල එකට කන්න එපා කියන්නේ ඒ වගේ වෙලාවක කොහොමත් මුහුණු ආවරණ ගලවනවා. අපි ආහාර ගන්නත් පැය කාලක් වගේ කාලයක් ගත කරනවා. ඒවා ඉතාම අවදානම් තත්ත්වයක් . මේ දවස් වල එක බත් එක බෙදාගෙන කෑම ඉතාම නරකයි . මං හිතන්නේ තව අවුරුද්දක් දෙකක් යනකන් එක බත් එක කන එක නොකළ යුතුයි. යමෙකුට තමන්ගෙ යාළුවට ආහාර වේලක් දෙන්න අවශ්‍ය නම් ඒකට වෙනම කෑම එකක් ලබාදීම තමයි සුදුසු වෙන්නේ.” යනුවෙන් මහාචාර්ය නීලිකා මලවිගේ මහත්මිය වැඩි දුරටත් සදහන් කළාය.

Ad Widget

Recommended For You

About the Author: Editor(T)

Leave a Reply

Your email address will not be published.